تانیشلیغیمیزدان بیر او قده‌ر ده کئچمیر. دؤرد گون اولا یا اولمایا!
من گؤرن گوندن سیگار داماغیندان دوشمه‌میشدی؛ بیر آن دا دوداقلاری بوش قالمیردی. ناهارا یاخین دؤردونجو قاتدا جوش وورماغینی گؤردوم. ایشله‌یه ایشله‌یه ده، شیرین- شیرین سیگارتی سومورور، توستوسونو ریه‌لرینین لاپ درینلیینده گزدیریب، سونرا بورنون دئشیکلریندن چؤله بوراخیردی. بیردن، آیاغی‌نین التینداکی دمیر اوینادی. دوداغینداکی سیگارلا برابر اوزو آشاغی آخدی. باغریم چاتلادی. شانس گتیردی نردوانین اوستونه دوشدو. نردواندان ایسه سوروشوب، گؤتو اوسته اوچونجو قاتین دامیندا یئره سریلدی. آنجاق بو حالدا دا سیگار دوداغیندان قوپمامیشدی و توستولمه‌سینه داوام ائدیردی. اوجورکی دوشدو، دئدیم بئینی پارتلادی. قورخو ایچینده هامیمیز ایشدن ال چکیب، دوشدویو یئره طرف قاچدیق.
هریانی سییریلمیشدی. بدنی بوتون گؤم- گؤی ایدی. آنلی پارچالانمیش، قیزیل قان صیفتینه آخیردی. آمما بئله بیر وضعیتده ده سیگاری آغارمیش دوداقلارینین آراسیندا هله ده توستوله‌ییردی. یئردن قالخیزدیق. زاریلدایا -زاریلدایا ال آتیب، جئبیندن سیگار پاکاتینی چیخاریب، کؤهنه سیگارین اودو ایله تازا سیگارینی آلیشدیردی. درین بیر نفس ووروب، توستونو کره‌نی کیمی بورنونون دئشیگیندن چؤله فیسقیردی.
زنگ ووردوق اورژانس گلدی. دؤرد یاندان قویدوق برانکاردین اوستونه. هله آمبولانسدا دوز- عمللی یئرین آلمامیشدی، آل آتیب دوستو «مش اکبر»ین کؤینک جئبینده‌کی سیگار پاکاتینی گؤتوردو.
یاریم ساعاتدان سونرا خسته‌خانایا چاتدیق. آمبولانسین ایچی تولامبارا اوخشاییردی. قاپینی آچار- آچماز توستو باسدی ائشییه. بیردن سیزیلدایا- سیزیلدایا دئدی: «بیرینیز قاچین اوچ دؤرد پاکات منه سیگارآلین. بلکه گئجه بوردا قالمالی اولدوم.»
برانکاردین اوستونده اورژانسا یئتیرنده، سیگاری داماغیندا هوشدان گئتدی. اوچ دؤرد دوکتور، پرستار دوشدولر جانینا. شووک وئرن کیم، یوموروق – شاپالاق ووران کیم! آنجاق فایدا ائله‌مه‌دی کی ائله‌مه‌دی. هر نه ائله‌دیلر نفسی قاییتمادی کی قاییتمادی. اومودلاری کسیلدی. چالیشدیلار هئچ اولماسا سیگاری اؤلوم توزو قونموش دوداغینین آراسیندان قوپارتسینلار. اودا قوپولمادی. سیگار دوداغیندا، اؤلوم ورقه‌سی حاضیرلاندی. چوخ چکمه‌دی اورژانسین تختیندن آییریب، تخته بیر تابوتا قویدولار.
خسته‌خانادان چیخدیق. آمبولانس قبریستانا طرف یولا دوشدو. هله شهردن چیخمامیشدیق، بیردن گؤردوک تابوتدان توستو قالخیر. توستو ایله برابر ده تابوت ایچیندن عجیب غریب سسلر گلیر. سن دئمه، خسته‌خانادا ایکی دقیقه سیگار چکمک امکانی اولمایان یارالی‌نین اؤلومونه سبب اونون آلدیغی مختلف بدن خسارتلری یوخ، قانی‌نین توستوسونون آزالماسی ایمیش.
تابوتون یانما توستوسو مرحومون بورنونا ده‌یجک، یئنی‌دن نفسه گلیب، دیریلمیشدی. اونو تابوتدان چیخارانا کیمی، قول- قیچی، بئلی- بالدیری یانمیشدی. یئنی‌دن اورژانسا قایتارماق فیکرینده ایدیک کی، یانیق – یانیق الیمیزدن قورتولوب، بیر توکانا گیردی. اؤزوموزو یئتیرینجه، دوداغیندا فیسقیران سیگاری ایله آخسییا- آخسییا، اؤسگوره- اؤسگوره بیزه طرف گلیردی …
پاییز ۱۴۰۳