میانا ادبی انجمنی طرفیندن تانینمیش شاعر «میانالی علیرضا»نین «بو دا بیر عؤموردی» و «بو دا بئله ناغیلدی» یئنی یاییلان کیتابلارینین تانیتیم تدبیری کئچیریلدی.
شهریور آیی‌نین ۳۰نجی گونو شاعر «دومان بختیار»ین آپاریجیلیغی ایله میانا شهرینین «زمرد» تالاریندا کئچیریلن بو تدبیرده، شاعر میانالی علیرضانین یاخین دوستو «سعید قافلان» تدبیری آچیق اعلان ائدیب و تدبیر صاحیبی‌نین قلمداشلاریندان «حبیب فرشباف»، «ناصر داوران»، «ارشد نظری»، «حاجی هریزلی»، «جعفر تانیش» و «حسین ریاضی» میانالی علیرضانین شخصیتی و یارادیجیلیغی حاقیندا دانیشاراق، اوره‌ک سؤزلرینی سؤیله‌دیلر. دانیشانلاردان علاوه، تدبیر اشتراکچیلاری ترکیبینده حاضیر اولان دیگر شاعر و یازیچیلاریمیزدان: «جانای خانیم رضوان»، «روح‌انگیز خانیم پورناصح»، «باهار خانیم»، «علی آغ‌گونئیلی»، «حق‌سئور میانالی» و …. اؤز قلمداشلارینین یارادیجیلیغینی آلقیشلایاراق، اونو سون واختلار یاییلان ایکی شعر توپلوسو موناسیبتیله تبریک ائتدیلر.
تدبیرین موسیقی حصه‌سینده گنج صنعتکارلار «احسان» و «عرفان نجفی» قارداشلاری، خواننده «بهلول پزشکی»نین مشایعتیله آذربایجان موغام پارچالاری و تصنیفلریندن ایفا ائتمکله اشتراکچیلارین تکرار آلقیشلارینی قازاندیلار.
تدبیرین سون حصه‌سینده تدبیر اشتراکچیلاری ترکیبینده اولان شاعر و یازیچیلاریمیز میانالی علیرضانین یئنی نشر اولان ایکی شعر کیتابینین ماکئتینده یادگار امضالاری آتدیلار و تدبیر اوچ ساعاتدان سونرا موغام پارچاسیلا باشا چاتدی.
تدبیردن بیر نئچه شکیلی حؤرمتلی اوخوجولارا تقدیم ائدیریک:
- شکیل‌لری حؤرمتلی «ارشد نظری» معلم ایشیق سایتینا گؤندریبدیر. تشکر ائدیریک.
