چوخ تاسفله، یاییلان خبرلر اساسیندا آذربایجانین تانینمیش ژورنالیستی، فولکلور تدقیقاتچیسی و ناشری «زهره وفایی» شهریور آیی‌نین سون گونو یاشادیغی تبریز شهرینده حیاتا گؤز یومموشدور.
1332نجی ایل تبریز شهرینده دونیایا گؤز آچان زهره وفایی ۷۱ یاشیندایکن همن شهرده ده ابدیلیک حیاتدان آیریلمیشدیر.
گئنیش یارادیجیلیق ساحه‌سی اولان زهره خانیم وفایی آذربایجان شفاهی خلق ادبیاتی تدقیقینده، تبلیغینده و نشرینده اوزون ایللر یورولمادان چالیشان آذربایجان مدنی فعاللارینین گؤرکملی سیمالاریندان ساییلیردی. اونون یارادیجیلیق ساحه‌سی اوشاق ادبیاتی، فولکلور، ساتیرا و ژورنالیسم فعالیتلرینی احاطه ائدیر و بونلارلا یاناشی «زینب پاشا» انتشاراتی‌نین صاحیبی کیمی ده بیر چوخ آذربایجان تورکجه‌سینده و فارس دیلینده اثرلر یایمیشدیر.
زهره خانیم وفایی‌نین ژورنالیسم فعالیتی داها آرتیق اوچ ایل اداره ائتدیگی «جوالدوز» ساتیریک ژورنالی‌نین نشری ایله معنالانیر. بو ژورنالین آذربایجان ساتیریک ادبیاتی‌نین انکشافیندا دانیلماز رولو اولموشدور.
زهره خانیم وفایی‌نین چوخ سایلی یارادیجیلیق نمونه‌لریندن: «فولکلور گنجینه‌سی» (۳ جیلدده)، «گئییم‌لر»، «سئنامالار»، «یوردومون شکیللری»، «قاب‌لار»، «حیدر عم‌اوغلو»، «سایالار»، «اؤلچولر»، «اوشاق مکتبی» (۲ جیلدده)، «سومرلرین موسیقیسی»، «اوروج»، «آختار – تاپ»، «قارین قولو جوجه»، «شاهسونلر»، «ائل بایاتی لاری»، «تاپماجالار – بیله‌جه‌لر»، «ضرب‌المثل‌لر»، «۹۹ حکایه»، «آنا»، «باهار»، «ال –اله»، «قاچ! توت»، «ائل ماهنی‌لاری»، «اوشاق نغمه‌لری»، «آلقیش‌لار و قارقیش‌لار»، «اویونلار»، «قارا قویونلولار-آغ قویونلولار»، «نام‌آوران آذربایجان» (۵ جیلدده) و بیر چوخ دیگر فارسجا دا یازدیعی اثرلری آد چکمک اولار.
عؤمرونون سون گونلرینه کیمی یاراتماقدان چکینمه‌ین و ده‌یرلی اثرلر موللیفی کیمی آذربایجان ادبی جمعیتینده اؤزونه مخصوص مؤوقع قازانان زهره خانیم وفایی‌نین جنازه‌سی مهر آیی‌نین ایکینجی گونو ساعت ۱۱ده تبریزین وادی رحمت مزارلیغی‌نین صنعتکارلار بؤلومونده مشایعت اولوب تورپاغا تاپشیریلاجاق و همن گونون آخشام اوستوسو ساعت ۴دن ۶یا قده‌ر ششگلان محله‌سینده‌کی میرمحمود مسجدینده خاطیره تدبیری کئچیریله‌جکدیر.
«ایشیق» – آذربایجان ادبیات و اینجه صنعت سایتی- امکداشلاری آدیندان گؤرکملی فولکلور تدقیقجیسی و آذربایجان مدنی فعالی زهره خانیم وفایی‌نین وفاتینی آذربایجان ادبی اجتماعیاتینا، اونون حؤرمتلی عائله‌سینه و دوست- تانیشلارینا باش ساغلیغی وئریر و خاطیره‌سینی عزیزله‌ییریک.
«ایشیق» – آذربایجان ادبیات و اینجه صنعت سایتی
۰۱/۰۷/۱۴۰۳
