مثلا ایییرمی یاشیمیز وار
یاغیش یاغاندا چور بیتمیر،
گؤی اوزونون دووشان اوره‌یی
بیزی گؤرنده
قاچیب گیزلنمیر،
دانیشاندا
سولارین جینسینده دانیشیریق.
دونیانین ان بؤیوک آرزوسو
بیزیم دویغولار
بیزیم قورخولار.
یئر اوزونون بارماق سایی وارلی‌لاریندانیق
اؤله بیلیریک ساده سؤزلر اوچون
آفریقالی اشرف مخلوقات اوچون
توستو بوغموش
تولکو بالاسینین اسیرلییینده.
مثلا قیرخ یاشیمیز وار
عاغیللانمیشیق
نیظاما سالیریق هر شئیی
خئیری شردن بیلیریک.
چؤره‌ک یولودور
آغاجین یاراسین باغلاماق
بالیغا سوخولجان وئرمک؛
آغریماز باشیمیزا
مین کیتاب نصیحت گره‌کیر.
نه دورا بیلیریک
یارالی شهریورین جبهه‌سینده
نه یاتا بیلیریک ناحاق قان کیمی.
مثلا آلتمیشی آشیرمیشیق
ایندی‌دیر یعنی:
گونه سرمیشیک اؤزوموزو
فلسفه سرگردانلیغیندا
چوخ بختیارلیقدا؛
خاطیره‌لر کیمی بیر دوکان آچمیشیق.
داش اولموش چای‌لاریق
نه سئل باجاریریق
نه کوکره‌ک دویغو.
بیر آز دا پست‌مدرن اولموشوق
معناسیز، تعریف‌سیز حیات
لاپ بئله سیرتیلیب.
کپنک عؤمروموز بیتدی
یاغیش آلتیندا یویونماق نوستالژیاسی
سؤزوموزدن ال چکمه‌سه ده.
۱۴۰۳/۰۶/۱۷
