آذربایجانین تانینمیش ادبی و اجتماعی شخصیتی «حسن ریاضی ایلدیریم»ین خاطیره‌سی، واختسیز ایتگیسی‌نین اوچونجو ایل دؤنومو مناسیبتیله، عاییله‌سی و یاخین دوستلاری طرفیندن عزیزلندی.
«آذری» ژورنالی‌نین باش رئداکتورو اونودولماز شاعر، تنقیدچی و ژورنالیست حسن ایلدیریمین شرفلی خاطیره‌سی تهرانین بهشت زهرا قبیرستانلیغی‌نین ۵۵-جی قطعه‌سینده یاد ائدیلدی.
«ایشیق» درگیسی و وبسایتی‌نین باش رئداکتورو «ائلدار موغانلی»نین آپاردیغی بو مراسیمده، حسن ایلدیریمین بیر سیرا دوستلاری اونون یوکسک اخلاقی کئیفیتلری، اجتماعی شخصیتی و ادبی مؤوقعی حاقیندا دانیشدیلار و مزارینا گول دسته‌لری قویاراق اونو حؤرمتله یاد ائتدیلر.
مراسیمین سونوندا «آذری» ژورنالی‌نین صاحیبی جناب «حسین ریاضی» عاییله طرفیندن تدبیر اشتراکچیلارینا، ائله‌جه ده آتاسی حاقیندا اوره‌ک سؤزلرینی سؤیله‌ینلره اؤز تشکرلرینی بیلدیردی. مراسیم ساعات ۱۱-ده باشا چاتدی.
اونودولماز آذربایجان شاعری و اجتماعی شخصیتی «حسن ریاضی» (ایلدیریم)ین خاطیره‌سینه نشر اولان «قیزیلی شفق‌لر شاعری» آدلی خاطیره دفترینی آشاغیداکی آدرسدن ائندیره بیلرسینیز.
۳۳۵ صحیفه‌دن عبارت بو کیتاب «ائلدار موغانلی»، کریم قربانزاده، مرجان منافزاده و ویدا حشمتی‌نین امکداشلیغی ایله نشره حاضیرلانیبدیر.
