دانیش قارداش قوربان اولوم،
من سسینه داریخمیشام!
آنا، آتا، باجی‌لارین
نفه‌سینه داریخمیشام!
آی‌لار اؤتدو، ایله دؤندو
بختین مندن اوزو چؤندو
آنام کیمی گونش سؤندو
شعله‌سینه داریخمیشام!
آنامین غملی گؤزونه
دیلینده «بالام!» سؤزونه
گؤرمه‌دیم دئیم اؤزونه
لای‌لاسینا داریخمیشام!
اؤز آنامین قوجاغینا
سؤندورولموش اوجاغینا
ائوی‌نین هر بوجاغینا
ذره‌سینه داریخمیشام!
بو دونیادان ناکام گئدن
منه حیاتی بخش ائدن
غربت ائلده آنامین من
کؤلگه‌‌سینه داریخمیشام!
آنا وطن، آنا یوردون
باتیریلمیش قانا یوردون
او قالمیش وئرانا یوردون
هر نه‌سینه داریخمیشام!
او گزدیییم یایلاقلارین
سو ایچدیییم بولاقلارین
باشی دومانلی داغلارین
زیروه‌سینه داریخمیشام!
کندیمیزده باغچا – باغین
باشی اوسته یئکه داغین
یوخاری چای، باش بولاغین
دؤره‌سینه داریخمیشام!
داریخمیشام قارداشا من
دوست- تانیشا، یولداشا من
یوردومون، باشدان باشا من
هر کسینه داریخمیشام!
یولونوزا باخان گؤزوم،
سیزه قوربان دئدیم اؤزوم
دئدیم: بودور منیم سؤزوم
قارداش! سنه داریخمیشام!
«شیری» دوشدو درده یامان
قویون دئییم زامان- زامان
اؤز یوردومون، هارای، آمان
کوتله‌سینه داریخمیشام!
یک پاسخ
صمیمی گوزل و عین حالدا محکم شعردی. یاشاسین