(اوستاد کریم مشروطه‌چی «سؤنمز»ین آد گونو مراسیمینده اکبر صالحی «قاداش»ین چیخیشی)
تهران ۱۴ اردیبهشت ۱۴۰۲- مدرسه بین‌المللی نیکو)
صابر ادبی انجومنی، ایلک اؤنجه بو عزیز گونو، بؤیوک و قوجامان اوستادلاریمیز کریم مشروطه‌چی(سؤنمز) و سید محمد حسین ناصحی جنابلارینا تبریک دئییر.
اوستاد سؤنمزین قودرتلی شعر و یازیلاری عمومیتله آذربایجان تورکجه‌سینده اولوبدور. فارس دیلینه گلدیکده، اونون حیدر بابانین فارسجایا ترجومه‌سی، بو اثرین بوتون فارسجایا ترجومه‌لری ایچینده زیروه‌ده دایانیر.
اوستاد ناصحی‌نین ایسه فارسجا اثرلریندن باشقا آنا دیلینده یاراتدیغی «زلزله بولاغی» و گله‌جکده یئنی-یئنی اؤز آنادیلینده یاراداجاغی اثرلر، آرتیق اوستادی آذربایجان تورکجه ادبیاتی دونیاسیندا یاشاداجاقدیر.
هر ایکی اوستادیمیز، صابر ادبی انجومنی‌نین آغ ساققاللاری اولدوقدا اونلارین توکنمز یارادیجیلیق ذؤوقلرینه، اوزون ایللر گله‌جه‌یی آرزیلاییریق.
البته صابر ادبی انجومنی تکلیکده و گاهدان قارداش درنک‌لرله بیرلیکده الوئریشلی دوروملاردا، بیر چوخ ده‌یرلی ادبی و قوجامان اوستادلاریمیزا لاییقینجه آغیرلامالار توتا بیلمیشدیر. ائله‌جه ده بو ایشه دوام وئرمه‌یی اؤز بورجو بیلیب و شراییط یاراتماغا چالیشیب و چالیشیر. آنجاق یازیقلار اولسون کی، انجومن دایانمادان، یئنی شراییط یاراتمیشدیرسا دا، مختلف باسقیلارا معروض قالیب، گونو گوندن الی- قولو باغلانیب و فرهنگسرالارین مسئوللاری طرفیندن اؤگئی اوشاق کیمی قیراغا قویولوبدور. بو مسئوللاردان داورانیشلارینین علتینی سوروشدوقدا، گؤستردیکلری دلیللرده، یالنیز – «یوخاری‌دان دستور گلیبدیر!» جومله‌سینه توش گلیریک و بو گونه‌دک یوخارینین کیم اولدوغو، اونلارین طرفیندن بیزه آچیقلانماییبدیر. اونون اوچون ده رحمتلیک اوستادلار: مظفر درفشی، هاشم ترلان، بهزاد بهزادی، مجید امین مؤید، حسن ریاضی(ایلدیریم) و بیر چوخ ابدیته قوووشموش آذربایجان تورکجه‌سی ابیاتی‌نین پارلاق اولدوزلاری‌نین یادیگاری اولان صابر ادبی انجومنی‌نین الیندن سالون ایمکانی آلینمیشدیر. بئله‌لیکله، انجومنیمیز آذربایجان ادبیات سماسی‌نین اولدوزلارینی بیر گوزگو کیمی عکس ائتدیریب، لاییقینجه قدردانلیق ائتمکده چتینلیک چکیر.
یئری گلمیشکن انجومن، بو جمعی یارادانلاردان، اؤزللیکله حؤرمتلی یازیچی، مطبوعاتچی، ناشر و ائله‌جه‌ده صابر ادبی انجومنی‌نین هئیت مدیره عوضوو، جناب دؤکتور مجدفردن درین منتدارلیغینی بیلدیرهرک، بو تؤره‌نی اؤزو قوردوغو تؤره‌ن کیمی حساب ائدیر و بو اوغورا قاتیلماغا اؤیونور.
ادبیاتیمیزی اینکشاف ائتدیرمک، ادبی سیمالاریمیزا تؤره‌ن توتماق و موسیقیمیزی خالق ایچینه آپارماق اوچون، بؤیوک سالونلاری الده ائتمک بیزیم طبیعی حاققیمیزدیر. بو حاققا چاتماغا ، گله‌جکده ده همیشه اولدوغو کیمی بیر کیمسه‌یه سیاست چؤره‌یی بورج وئرمه‌دن دیره‌نیب، چالیشاجاغیق.
اوستاد سؤنمزین آچیل سحر شعر‌ینده ناظیم حکمت‌دن بورج آلیب، آیاقلاشدیغی مصراعلارلا بیز ده آیاقلاشیب دئییریک:
من یانماسام گر،
سن یانماسان،
بیز یانماساق،
هانسی آلوولار ایشیق سالار بو دونیایا؟!
و اوستادین دیلکلرینه قاتیلیب دئییریک:
آچیل سحر،
اویان گونش!
آچیل بو سون نفسده
بو…
14/۲/۱۴۰۲
