بیر تیکه یاشام اوچون
اؤلومون قوجاغیندا
قان بلله‌لرین بوی- بوی اودوب
و گئجه‌نین اینجه یئریندن قوپاردیق.
قالین- قالین هارایلاریمیزی
و نیسگیل دولوسو ایستکلریمیزی
باش اؤرتولرین اورتاسینا بوراخیب
و قورخمادان
قورشونلارین اؤنونده
ساچلاریمیزی اوزون- اوزون هاوالاندیردیق
و ییخیلیب- ییخیلیب یئنی‌دن آیاقلاندیق
و ایللر بویو
اودقوندوغوموز قیشقیریق‌لار
گنج بوغازلاردان چیخدی.

هارای، هارای!
من بوردایام
سن بورداسان
بیز بورداییق.
گلین گلین قیزلار!
گلین قیزلار قورخمایاق
و قان- تر ایچینده ایسلانان گنجلییمیزی
آزادلیق دؤنگه‌لرینه سرپک،
بلکه
بیزدن سونرا هر گلن- گئدندن
توز قورپماسین،
بو گؤیچک قیزلار آغلاماسین، اؤلمه‌سین،
اوزون- اوزون ساچلاری
ایپک یولون توتماسین!
گلین، گلین
گلین قیزلار قورخماسین…!