قدرتلی شاعر، متفکر ژورنالیست و آذربایجان ادبی- مدنی جمعیتی‌نین اعتبار و حؤرمتینی لاییقینجه قازانان اجتماعی شخصیت دوکتور حسن ریاضی (ایلدیریم)ین ایتگیسیندن بیر ایل کئچدی. بو بیر ایل عرضینده نه او اونودولدو، نه ده بیز اونو اونوتدوق. شبهه‌سیز، نه قده‌ر اینسانلیغا محبت، انسان سئورلیک، عدالت و آزادلیق سؤزلری معنالانیرسا، او اؤز معنوی حیاتینی سئون‌لری‌نین، آذربایجانین و ایرانین ادبی – مدنی جمعیتی‌نین قلبینده داوام ائده‌جکدیر.
آذربایجان مدنیت سماسی‌نین ایلدیریمی اولان دوکتور حسن ریاضی، اجتماعی-مدنی حیاتین موختلیف اؤلچولرینده اؤز باجاریغینی نوماییش ائتدیرن چوخ شاخه‌لی شخصیت ایدی. او، تعهدلی شاعر، اوستاد یازیچی، آزاد دوشونجه‌لی متفکر، امانتدار ترجومه‌چی، یورولماز ژورنالیست، آزادلیق و عدالت کیمی بشری ایدئال‌لارا صادق قالان بیر شخصیت اولوب، عؤمرونون قیرخ ایلدن چوخونو بو آرزو و ایدئال‌لارین حیاتا کئچمه‌سینده موباریزه‌یه صرف ائتمیشدیر.
او، تعهدلی مدنیته و ادبیاتا صداقتله اینانیر و اونو خالقین اجتماعی حیاتیندان و معیشت شرایطیندن آیری حساب ائتمیردی. ائله بونا گؤره‌دیر کی اثرلری ده خالقین اجتماعی حیاتیندان آیریلمامیش، اینانج‌لاری ایسه یاراتدیغی اثرلرینده اؤز گئنیش عکسینی تاپمیشدیر.
ژورنالیست‌لیک ساحه‌سینده ده ائله بو اینانج‌لار اساسیندا ایگیرمی ایله یاخین فاصله‌سیز و گئجه-گوندوز فعالیت ائتدی. ائله بیر فعالیت کی، نتیجه‌سی ایکی دیلده یاییلان و جمعیتده اؤز مثبت تاثیرینی بوراخان «آذری» مجله‌سی‌نین منتظم، محصولدار و عموم خالق اوچون نشری اولدو. او مجله کی، رئداکتورونون ابدیته قووشانا قده‌ر حاضیرلادیغی هر نومره‌سی اینسان آرزو و اومیدلرینی اؤزونده جمعلشدیرن، آذربایجان و ایران خالقلاری‌نین معنویاتینی عکس ائتدیرن بیر مدنی محصول سویه‌سینه یوکسلدی و اومید ائدیلیر کی، بوندان سونرا دا بئله خصوصیت‌لرله اؤز نشرینه داوام ائتسین.
بوگون ائله بیر ایستک‌لی اینسانین مزاری باشینا توپلاشاجاغیق کی، او ثمره‌لی عؤمرونده یاشادیغی ایل‌لر باهاسینا انسانلیغا صداقت و خالقا باغلی‌لیق آنلاملارینی معنالاندیردی. توپلاشاجاغیق سئویملی خاطیره‌سینی عزیزله‌مک‌له برابر، اونون ۶۳ ایل‌لیک دولانباج عؤمور یوللارینی ایشیقلاندیران اجتماعی حیاتی‌نین موختلیف قاتلارینا حؤرمتله یاناشاق. آخی او بو شرفلی عؤمور یوللارینی باشی اوجالیق‌لا و لیاقت‌له آددیملایان و ابدیته قووشان بیری اولموشدور. عزیز و شرفلی خاطیره‌سینه عشق اولسون!
جمعه گونو ۲۸ مرداد – ساعات ۱۰دان ۱۱:۳۰ قده‌ر
تهران – بهشت زهرا مزارلیغی – قطعه ۵۵ – ردیف ۵۸ – نومره ۲۰
ریاضی عائله‌سی
آذری فصلنامه‌سی
ساهر ادبی مدنی درنه‌یی
«ایشیق»- آذربایجان ادبیات و اینجه‌صنعت سایتی
28 مرداد ۱۴۰۱
