گئدنده-
گئتمه! دئیه،
یالواردیغیم کیمی یالواریرام-
نه اولور دؤنمه گئری!
دؤنمه سئوگیلیم!
اووجدان تؤکولن سو کیمی
تورپاغا تؤکولدوم؛
کیم منی تورپاقدان آییرتلایا بیلر، کیم؟!
یاغ کیمی اریدیم،
دامارلاریمدان چیخدیم؛
یاییندان چیخان اوخو –
کیم گئری دؤندره بیلر، کیم؟!
خاطیره‌سی ایتمیش کوچه‌لره-
چیرپدی باشیمی
منی جایناغینا آلان کولک‌لر؛
کیم منی بو آزغین شه‌هردن توپارلایا بیلر، کیم؟!
دؤنمه نه اولور،
گؤرمه‌لی، باخمالی گونده دئییلم؛
گوزگولر بئله ایشله‌میر بیزده.
بیر داها یالواریرام:
دؤنمه سئوگیلیم!
یانیندا اوتانیب،
سنی اوتاندیرماق ایسته‌میرم.
