قیسا شعرلر (۲۷)
فریبا مرتضایی
(1)
آیاقلارینین سسی گلیر،
تلسه – تلسه
قاباغینا چیخیرام.
باخ
اورهییم ازیلیر…!
(2)
بوگون-
سالام وئردیکلریم
صاباح-
اوز چئویردیلر مندن.
سن ده-
هرکسلشمه!
(3)
سون باهاردا یازدیم
توم قارشیلیقسیز دویغولاریمی،
هارادا اولورسان اول
فصیللره آلدیرما!
سن
منیم ایلک باهاریمسان.
(4)
آی-
حسرت قالدیغیم!
دونیا منه-
بیر «سن» بورجلودور…!
(5)
باخدیم سطیرلره
آدیم یوخودور…
کئشکه
رئیحان اولایدیم،
بیر آخشام اوستو
اورهیینین سوفرهسینده
باغ- باغ آچیلایدیم…!
یک پاسخ
سلام اولسون ایشیق سایتیندا چالیشان عزیز و حؤرمتلی امکداشلارا. چوخ ممنونام منیم قیسا شئعیرلریمه دفعه لرله یئر وئردیینیز اوچون. سون درجه منتدارام!☘