شهریمیزه قیش گلدی
قار گلدی، یاغیش گلدی
خیاوانی سئل توتدو
آیاغا قالیش گلدی!
قیش گلیبدیر تبریزه
قار چاتیر ایندی دیزه
مسؤول‌لار آیین- شایین
چونکی قار یاغماز میزه!
قارغا دئییر: «قار- قار
دیزدن اوسته قالخیب قار
هم تاکسی دربستی توت
هم‌ده شوفئره یالوار»!
سویوق‌دان توتولور دیل
اوشاق‌لار قالمیش سفیل
ساعت اون‌دا دئییرلر:
«مدرسه اولسون تعطیل»!
دؤرد ساعت‌دیر یاغیر قار
آغاریبدیر دام- دیوار
هواشناسی دئییر:
گؤی‌ده آزجا بولوت وار»!
قار توتوبدور هر یانی
باغلاییب اوتوبانی
یول مدیر کلّی دئییر:
«بس بو میکروفون هانی؟!»
ماشین قالیرسا قاردا
دئمه: «مسؤول‌لار هاردا؟»
عزیز قارداش! آزجا دؤز
یول آچیلار باهاردا!
