چیلله گئجه سی

رقیه علیقلیان «لاله»

چیلله نین خونچاسی یایدا دوزولدو،
مینه دن اوزوملر بیر-بیر اوزولدو،
تاوانین باشیندا سیرا دوزولدو
بیر چکه میانپور، بیر چکه انجیر،
گونون اورتاسیندا دوزولدو بیر_بیر.

دوشابی قازاندا آنام بیشیردی،
باسلیغی سازلاییب رَفدن دوشوردی؛
جویزی، بادامی دریب گتیردی،
ایده نی، خورمانی بیزه یئتیردی.
آتامدا پاییزدا ناری، قارپیزی
سامانا قویلادی لاپ سؤزون دوزی.
چیلله نین سحری سوفره نی آچدیق،
قوهوم اقربانین دالینجا قاچدیق.
آنام دا قوورما شورباسین آسدی،
شوربانین قوخوسو دوواردان آشدی.
گئجه دئییب گولوب شنلیگه باتدیق،
کدرین، غصه نین داشینی آتدیق.
چیلله نین قورخولو قارانلیقلارین
آلوولار گورلانیب سیلدی غوبارین
ظولماتی قوودولار ایشیقلی داملار
یئنی نور یاراتدی ال بیر آداملار
99.۹.۳۰