سیرخابدا
اتک‌ده اود یانیر
توستو قالخیر گؤیلره.
توستو گئدیر
داغ قالیر ائللره.
۱
اورادا، «کهلیک»ده
عاشیق چالیردی
نغمهدن بیر داملا دامدی،
اوره‌ییمده قالدی!
۲
عینالی تبریزه باخار
تبریز عینالی‌یا؛
سئل اوردان آخار آشاغی
ائل بوردان قالخار یوخاری.
۳
«قونیا»یا
سیرخابدان دئییرلر
سیرری اولاراق
یول وار یئرآلتی …!
خزینه‌لر گئدیر، گلیر …
۴
عینالی گئجه‌لر
آغیردیر.
داریخما!
سحر یاخین‌دیر.
۵
دنده باخدیق
اوردان مچیده آخدیق
یامان یورغونودوق
بیلمه‌دیک نه واخت یاتدیق
یعنی گئجه «بقعه»ده قالدیق.
۶
«امام آیاغی»ندان
قالخدیق،
آخشام خوجادایدیق؛
ایندی بیزه
«امام خواجه» دئییرلر!
۷
عینالی‌دا چیراغ یانیر
عینالی‌دا یامان یانیر
عینالی‌دا چیرآغ یانیر
عینالی‌دا اویاق یاتیر
۸
اول آخشام
اَتکده
بیری قارپیز ساتیردی؛
هله «کهلیک»ده داغچی
چایدانا یارپیز آتیردی
قارپیزدان شیرین…
اوغلانا قیز قاش-گؤز آتیردی
قاش بیردن قارالدی!
۹
«آرحیم‌آغا»۱ عینالی‌دایدی
عینالی چوخ صمیمی و عالمانه؛
بختورلیک حس اولونوردو،
کوراوغلودان صحبت کئچیردی…
گئدیردی …
تاریخ واراقلانیردی.
۱۰
اورادا
«دوزگون» امامت ائتدی؛
تبریزه ناماز قیلدیلار!
۱۱
«خاماچی»له۳ اوسته گؤروشدوک
اوندان عکس‌لر سالدیلار…
چوخ سالدیلار،
من دوشدوم!
۱۲
«بقعه» ایچیندن باخاندا
محراب آیری تهردیر،
گؤرونن اسکی شه‌هردیر.
۱۳
سجادهنی چؤله سالدیق
«پیران»دا۵ دستماز آلدیق
آی‌دان پارلاق، گولدن گؤزل
یار ناخشین گؤیلره سالدیق.
۱۴
قبیر وار اوردا
قبیر … داغدا
قیزیل وار اوردا
قیزیل قبیرده
داغ وار اوردا.
۱۵
بو داغ دولای – دولای‌دیر
اووجودا دامار – دامار
جیغیر – جیغیر.
باشی بلالی داغ‌دیر،
ایکی گؤزو آغلاردیر.
بو حوض
«ترلان»ین۶
بو بولاق دا
«کهلیک»ین؛
گؤرن جوما گونو
قوناقلایاجاقمی منی ده؟!
اَل آچیقدیر عینالیم.
۱۶
بو سلطان
گونده نئچه بویادا
دون ده‌ییشیر:
سحر آغ گئییر
گون اورتا قیرمیزی‌دیر پالتاری
سونرا گؤیه چالیر
گئییمی؛
گئجه چیلپاقلارین ائویندن
باخسان اونا،
بورونوبدور قارا دونا.
۱۷
اته‌یینه
مینلر چیلپاق سیغینیر؛
اوره‌یی‌نین اودو
باشینداکی اوجاقدان
دالیب کؤکسونه
یاندیریر
یاندیریر
اته‌یین هله ده…
۱۸
آلاتوراندا چیخدیق داغا
چای چانتامیزدا باللی خاما
گونش سرگیسین سرنده، بیز
باخدیق اوجا دنده، ونیارا.
۱۹
عینالی‌یا قار دوشدو
خاطیریمه یار دوشدو
بادامدان اود یاندیردیق
گؤزومه بیر نار دوشدو.
۲۰
روحو تبریزین
عینالی‌دا گیزله‌نیب
او اوشاق نفسی گئدن کیمی.
21
الینده کشکول، دیلینده یاهو
مشهددن درویش گلدی بقعه‌یه
جاماتدان خئیلک نیاز گؤتوردو
گئدنده ییغدی قیزیل بوغچه‌یه.
22
«صمد عمی» کئپی باشیندا
اوردا بولاقدا
داغ سوفره‌سین آچدی،
تازا سنگک، کله – پاچا
شوخلوق ائلیر؛
قویما قاچا!
سونراسی چای چای اوسته
دئدی: گؤروم بیر پاپیریز
یوسف دئدی: باش اوسته!
صمد عمی بورکون آتدی قیراغا
سازی باسدی قوجاغا.
23
قارالاندا قاش
«آجی»دان باخ
نه شیرین‌لشیر
بو داغ.
24
سئل اولدو
چایلاق‌دا…
ایلان سورونور،
چایلاق‌دا
ایلان سورونور؛
سئل اولدومو…؟
25
اوزاقدا
چراغ یانیر.
داغدا ، چادیردا
بیر نر قایا اوسته.
26
«سید»بابا عینالی دا قوجالدی.
دئییر:
بالام عینالی دا قوجالدی!
سید داغدان هله کوسمه‌ییب
قاش قارالیب،
سحر چیخیب داغا هله ائنمه‌ییب.
گولور دئییر:
اوره‌ک ببه‌م داغدان
هله اممه‌ییب.
27
داغدا هوشلانیردیم
اوزاقدا عاشیق چالیردی
اوخویوردو.
کپنک‌لر اویانیردیلار
داغ رنگینه
سرخابا
بویانیردیلار.
28
عینالی‌نین مین داشی
اوستونده گؤز یاشی.
ندن گؤیرچینلر
اوچمازمی بورادا؟!
29
عینالی‌دا آدام وار؛
گولله آچیلدی!
داغدان سس گلیر…
بقعه‌ده آغلایان وار،
… حو… سی ی ی … ن…!
30
قوجا آنام!
نئجه قالخدین بو داغی؟
آنامین خیال قاصدی‌دیر
خوش گلدین!
گؤزلریم گؤلونده
چیمیر خاطیره‌لر.
31
عینالی‌دا یارپیز اولار
کوله‌لرده قارپیز اولار
آخشام اوستو، داغا چیخان
قول- قولا، اوغلان – قیز اولار.
32
عینالی‌یا یول چکدیلر
داغچی‌لاردا ال چکدیلر
گون یاخمیشدیر داغ دؤشونو
داغ دؤشونه گیل چکدیلر!
33
عینالی‌دان «آجی» گئدر
آجی‌دان «بئش باجی» گئدر
جوما گونو عینالی‌یا
فاغیر گئدر، حاجی گئدر.
34
سُهرود داغی
سهراب داغی
سرخاب داغی
صوفو داغی
عین‌علی!
۱: رحیم رئیس‌نیا
2: دکترصدیق
3: بهروز خاماچی
4: دونیالارجا تاسفله‌لرله بو صون واختدا بقعهنین تاریخی محرابین گؤتوردولر!! رحمتلی آسید واختیله عؤمور بویو بعقه‌نین متولی‌سی اولموشدور.
5: ترلان حوضو
6: ترلان حوضو بقعهنین دالی دره‌سینده یئرلشیر و سابق پیران حوضو دئییرمیشلر. باخ ؛ روضات الجنان، ابن کربلایی
