بیر یاندا اوروجلوق…
حمید احمدزاده «تیلیم‌خانلی»
بیر یاندا اوروجلوق آیی دورموشدو قاباقدا
بیر یاندا دا یوخدور یئمه‌ییم تاختا- طاباقدا
سولموش قوروموش گول اوزوموز آجلیق الیندن
بیر دامجی دا قان رنگی گؤرونمور بو یاناقدا
بیر نئی کیمی بوی چکمیش اوشاق خوش گونه خاطیر
بیر ذره ده شئه، شیره تاپیلماز بو بوداقدا
بالتا یارا بیلمز او آغاج‌لاری عزیزیم-
ساپلانماسا گر دسته آغاجلارلا ناجاقدا
یاخدیم جانیمی عؤمر بویو عشقیمه خاطیر
من کول کیمی گؤزدن گئدیرم ایندی قیراقدا
صوبح اولدو گئجه چاتدی سونا، نرده آزادلیق؟
اولدوزدا باتیب گئتدی، سحر سوندو چیراغ دا
من لحظه‌لری سایمادا اؤزگورلویه خاطیر
اؤزگورلوک اؤزو دوستاق اولوب باغلی اوتاقدا
گزمه گؤزه‌لیم ائلدن اوزاق، اینصافین اولسون
حسرتده‌دی آزادلیغا دوستاقدا قوجاقدا
تورکون آدی هر یئرده منیم افتخاریمدیر
اؤلسمده آدی سسلنه‌جک غملی دوداقدا
اؤز عهدینه هرلحظه «تیلیم‌خانلی» گوونمیش
هر وقت چاغیرسان گله‌جک واختا به واختا
۱۳۹۶/۳/۶
یک پاسخ
تیلیم خان شعره چوخ واخت قویمالی دیر