دیکلمه صنعتی؛ اوچونجو حصه: سسه زیان ووران عامیل‌لر
کبری میرحسینی
قاباقکی یازیمیزدا سسدن محافظه ایله باغلی تاپیشیریقلار وئره‌رک، دئدیک کی، سس مهارتی‌ایله باغلی بوتون ایشلر کیمی، دیکلمه صنعتینه گلدیکده ایسه، سسه زیان ووران عامیللردن چکینمه‌لییک. بو یازیمیزدا بو عامیللردن بیر نئچه‌سینه اشاره ائدیریک:
۱. بوغازی تئز-تئز آریتماق سس تئللرینه زیانلی‌دیر. عمومیتله بوغازین قاشینماسی ایله اؤزونو گؤسترن بو پرابلئم، بعضی‌لرینده آلرژیک اولسادا، اکثر حاللاردا بیر عادته چئوریلن ایشدیر. بونون یئرینه بوغازیز قاشیناندا بیر قورتوم ایلیق سو ایچین و بو عادتی باشینیزدان چیخاردین.
۲. قیش فصلینده بعضی سببلر اساسیندا تکرار سویوق دَیمه‌لر و اؤسکورمه‌لر ده سسه زیان ووران عامیللردندیر. بورادا دا باشاردیقجا اؤسکورمه گلدیکده، ایلیق سو ایچیب، دال با دال اؤسکورمه‌لره مانع اولماغینیزی تؤوصیه ائدیریک. پس سویوق دَیمه‌‌نیزی سهل سانمایین و حکیمه مراجعتله تئزلیکله اونون درمانینا چالیشین. سویوق دَیمه و اؤسکورمه‌نیز معالجه اولمایینجا دیکلمه ائتمه‌یین. چونکی بو ایشله بوغازینیزا ضرر یئتیشیب، معالجه مدتی اوزون سوره‌جک.
۳.بعضی اینسانلاردا چکی‌نین چوخ اولماسی و کؤکلوک ده بلاغتلی دانیشماغا مانع اولوب، نفس کم گتیرمه‌یه سبب اولار. دئمک حدیندن آرتیق کؤک اولانلار نفس آلماقدا پرابئلمه دوشه‌ره‌ک، سس تئللری زیان گؤره‌جک. البته بو مسئله ده استثنالار دا واردیر.
۴. سسه زیان ووران باشقا عامیللردن بیری ده سیغارا چکمک‌دیر. گؤزل سسه مالک اولماق ایسته‌ییرسیزسه سیغارا چکمه‌یین.
۵. دایما استرسدن اذیت‌چکن اینسانلارین دا دانیشیقلاری و سسلری یاخشی چیخمایاجاق. استرسلی یاشاماغین زیاندان باشقا هئچ ثمره‌سی یوخدور.
۶. معین یوخو ساعاتلاری اولمایان و کیفایت قدر یاتمایان شخصلرین ده دانیشیقلاری و سسلری پرابلئملی اولاجاق. پس لازیمینجه یاتین و یوخو ساعاتلاریزی اینتیظاما سالین.
۷ .دوزگون قیدالانماق دا سسین محافظه‌سی اوچون أن اؤنملی عامیلدیر. اوجمله‌دن حدیندن آرتیق سرین یئمکلر یئیب، دایما بوزلو سو ایچمک؛ چوخ آجی(بیبه‌رلی و ادووالی) هابئله تورش خوره‌کلر یئمک سسه زیان وورار.
۸. باغیرماق و یا حدیندن آرتیق اوجا سسله دانیشماق ایسه، سسه زیان ووران عامیللردندیر. بومسئله‌یه، هامیمیز عمومیتله بیز آنالار، تکرار راستلاشمیشیق. ائولادلاریمزدان سهو ایش باش وئردیکده، عادتا اوجا سسله اعتراض ائدیریک؛ اوزامان بوغازیمیز درحال قاشینماغا باشلاییر و بعضاً سسین موقتی اولاراق باتماسی ایله نتیجه‌له‌نر.
۹. بیر سئودییز ماهنی‌نی سسلندیریب، اونونلا سس-بیر اولاراق زمزمه ائدیب-اوخوماق نه قدر سس یئتیشدیرمکده تؤوصیه اولونسادا، بونون اوزباشینا و مربی سیز تکراری، بوغازیمیزا و سسیمیزه جبران ائدیلمز زیانلار وورا بیلر.
۱۰. سحر تئزدن دانیشیغا باشلایین. البته بو سسینیزی زورا سالماق معناسینا دئییل. آنجاق سحر تئزدن دانیشیغا باشلاماق، اوزون زامان دولغون بیر سسه مالیک اولماغینیزا یاردیم ائده‌جک. بونون عکسینی تک باشینا یاشایان انسانلاردا گؤرمک اولار؛ بیریسی ایله دینیب دانیشمادیقلاری اوچون، گون اورتایا قدر سسلرینین آچیلماماسی احتمالی وار.
آردی وار…
