ایندی بیز نئیله‌یک، ملکنژاد؟
نیگار خیاوی

محمد ملکنژاد دا بوشونا گئتدی ادبیاتیمیزین بوش قالمیش الیندن. محمد ملکنژادین اؤلوم خبری سارسیتدی ایچیمی، اونو یازیب یاراتدیغی اثره ادبیات چئوره‌سینین سوسقونلوقلا یاناشماسی دیغلاتدی… ادبیات چئوره‌میزین باندبازلیغی، شهرتبازلیغی، اوستادبازلیغی، دارگؤزلولویو… چَرلتدی. سن منی دوکتور عنوانلا، من سنی. سن منی معلم اوستاد عنوانلا، من سنی. بئله بیر بوغاناقلی اویونلار چرلتدی اونو. اونو بیزلر چرلتدیک، اونون اؤلومونده هامیمیز گناهکاریق، هئچ بیریمیز یاخا قاچیردابیلمریک بو جنایتدن. هانی بیزلری جزالاندیراجاق عدالت محکمه‌سی؟ هر بیریمیز بو محکمه‌نی اؤز ایچیمیزده قورماغا محکوموق. محمد ملکنژاد ادبیات چئورهمیزین قارا بوغاناغینا دوشدو، محمد ملکنژادین ایکی گون قاباق دوستونا {حامد لطفی‌یه}یازمیش اولدوغو پستو اوخویون:
«یوخ حامد جان یوخ
یانیلمایین
توپلومون ائتگیسی و یا باشقا بیر زاد آرادا یوخدو
یاشیم و تجروبم ده فانتازیا دوشونمه‌یی مندن اوزاخلادیر
سؤز فن اهلیندن گئدیر
بونا یانیرام … ‌کیمی ادامین نییه گرک بئش نفره بیر ‌کیتابی اولا
و یا … ‌و باشقالارینین الینه چاتمایا
ایشین لنگلیییندن چاتیشمازلیقلاردان یانیرام
بیر نامرد … ‌توش گلدیییمدن یانیرام
ادام سیزلیقدان ییه سیزلیکدن…. یانیرام»
من همیشه دئیردیم: بیز یییه‌سیز ملت‌ایک. آنجاق ایندی بئله دوشونمورم، یوخ، بو دئییل، بیز ملت دئییلیک آخی، داها دوغروسو بیز بیر توپا یییه‌سیز آدام ییغیناغیییق، نه ملّتی؟
هر کس ایندی الینه قلم آلسین و اونون باجاریغی، یئتنه‌یی، یارادیجی گوجو، قلمی باره قلم چالسین، نؤوحه قوشسون- منیم ایندی ‌قلم چالیب نؤوحه قوشدوغوم کیمی- حئیفسیلنسین، یانیخسین، تئز قاچیب کتابینی آلیب اوخسون… الیمیز هارا چاتاجاق؟ ایندی هامیمیز باشلایاق بیر بیریمیزه، ادبیاتیمیزا یوکسک سسله اورکدن باش ساغلیغی وئرمه‌یه، یعنی اورک ائویندن گؤردویوموز ان گوجلو ایش!
گلین اَیری اوتوروب دوز دانیشاق، ملکنژادین یازدیغی اثری قارشیسندا لال اولوب سوسموش ادبیات چئوره‌میز حکومتین باسقیسی آلتیندایدی می؟ ملکنژادین یازدیغی اثری تانیتدیرماغا، باره‌سینده تنقیدی مقاله‌لر یازماغا حکومت قاداغا قویموشدومو؟ گؤرَسن گئجه-گوندوز سوسیال شبکه‌لرده دولانان ادبیاتچیلارا حکومت طرفیندن ملکنژادین «بوغاناق»ی باره‌ده یازمالاری یاساقلانمیشدی می؟
یوخ، بونلار دئییل، ملک نژاد یییه‌سیزلیکدن، ادبیات چارخیمیزین لنگلیییندن، ایشین چاتیشمازلیغیندان اورَیی پاتلادی. اؤزو هر شئیی دریندن گؤروب و دوروموموزون نه یئرده اولدوغونو گؤزلجه قاورامیش ایدی، بونا گؤره ده یانیردی، یاناجاغینی دا قاباقجادان گؤروردو. ۶۰-۷۰-نجی ایللرده یازماغا باشلامیش اولان یازارلاریمیز بو سوسقونلوق دردینی دریندن یاشامیشلار، ائله بیل بیزلر یامان گؤنو قالینمیشیق، اورَییمیز شیشدیسه ده پاتلامادی، یاندیق آنجاق یانیق-یانیق داوام ائتدیک…
ملکنژاد! کیشی، ظالیمین بالاسی، سن ده بیر تهر دؤزیدین کئشکه!