قیسا شعرلر(۲۵)
فریبا مرتضایی
۱
ساغ اول
منی بو تَهَر گولدوردویون اوچون
گولمکدن گؤز یاشلاریم
یاناغیمدان آخیب
دوداقلاریمین گؤشه‌سیندن سوزوب
قولاقلاریمین آستاناسیندا
شور دنیز کیمی دالغالانیر!
باشیمدا اَسدیردیین گولومسمه هاواسی سَرینه‌دیر
اوره‌ییمده آلوولانان نیسگیللری
آینانین اؤنونده‌یم
قیزارمیش گؤزلریمین ایچی
نئجه
نئجه
نئجه
گولور
دؤرد قاپی اویانا سَسیم گئدیر
ایچیم کئچیر غملردن اوزاق یئرلره!
ساغ اول
منی گولدوردویون اوچون!!
۲
باخیشیندا اولان ایشیغی
قاماشمادان اوخودوم!
اوره‌یینده اولان
سئوگینی دانمادان
سنه عایید هر سؤزو سؤزلویو
سطیر- سطیر آتلامادان
آه من اوخودوم
آدامیم!
سنسیز کئچن گونلریمی
آدیم- آدیم اؤزله‌ییب
آغلاییب،
اوجادان دئییل،
قیشقیریب اوخودوم
نئیله‌ییم
نه تَهَر اوخویورام، سئودییم
حایات بیزه
بیلدیینی اوخویور!
۳
آی منیم اوشاقلیغیم
هایاندا قالیبسان
آغ گونلریم ساچیما دوشوب
قاراسی بخت آیناما
باخیب باخیب آغلامیشام
دیزلریم گلمیر سنه!
سن گل بیزه
باشینا دؤنوم داریخمیشام
۴
بو سنسیزلیک داشین
نئجه باشیما سالیم
باشیمدا فیکرین ازیلیر.
۵
دونیانین‌کئفینه باخمادیق!
دونیا گلسین
کئفیمیزه باخسین.
