دیلیم
اکبر رضایی
شیرین سَس‌سن، شیرین سؤزسن
منه آهسته لای لای چال!
گرایلیم‌سان، بایاتیم‌سان
منه آهسته لای لای چال!
منه قوشما، غزل سنسن
منه ایلکین، ازل سنسن
گؤزه‌للردن گؤزه‌ل سنسن
منه آهسته لای لای چال!
گوموش تک آغ جامالسان سن
قیزیلدان بول خارالسان سن
خومار گؤزلوم مارالسان سن
منه آهسته لای لای چال!
منه آرامش جان‌سان
داماریمدا قیزل قان‌سان
منیم فخریم، منه شان‌سان
منه آهسته لای لای چال!
«ده‌ده‌م قورقود» و «بابک»سن
منه «ستار» کیمی تک‌سن
بیزه گوجسن و بیرلیک‌سن
منه آهسته لای لای چال!
«فضولی»م سن، «نسیمی»م سن
و «خاقانی»م، «حبیبی»م سن
خدادان سن نصیبیم سن
منه آهسته لای لای چال!
منیم اؤلکه‌م، ائلیم سنسن
منیم آرخام، بئلیم سنسن
منیم دادلی دیلیم سنسن
منه آهسته لای لای چال!
۱۵/۴/۹۳
5 پاسخ
مثل بقیه کارا عالی
تشککورلر سایین :
1- هادی عبادی
2- شهریار
3- عرفان
اوره یینیزه قوربان
اورک دولوسو مینتدارام باخیشینیزدان دولایی.
ائلیمیزه دلیمیزه خالقیمیزا عشق اولسون
چوخ گوزلیدی
چوخ گوزلدی منیم گوزل اویرتمنیم❤❤❤
چوخ گوزل ساغول