دانیشیب گولنمیرم
دومان بختیاری

سن ائوین‌ین دوستاغی،
ائوینه گلنمیرم.
سنی شعره چکندن
دانیشیب گولنمیرم.

یوللار، قاپیلار، گؤزلر،
سسینده سینان سؤزلر،
باغری یانان دنیزلر-
اؤل دئییر اؤلنمیرم .

بو داغ سینه داغلاییر،
یئل سنی سوراقلاییر.
پنجره‌میز آغلاییر،
گؤزونو سیلنمیرم.

سنه چاتان یول دومان،
کؤرپولرین باغری قان،
باخ خییاوان- خییاوان-
محببت دیله‌نمیرم .

نه دیر بو آغری گؤره‌ن،
بو دمیر یول، بو ترن؟
سنی مندن گؤتورن-
نه دیر؟ نه؟ بیلنمیرم .