ویجدان قارغاشاسی
قاسیم پناهی
قاریش _ قاریشیندا سیزیلتی
موصیبت
ساواش
اؤلوم،
تاریخ بویو ساتیلمیش قیزلارین باکیره‌لیک قانیندان دویمایان پیلانئت
و اؤزوندن اوتانمایان اینسانلیق
نه بویلار یوخسوللوق یوکونون آلتیندا اگیلمه‌دی!
نه اونورلار بیر پارچا چؤرک اوچون ساتیلمادی!
و نه قادینلار…،
هه
اؤکسوز اوشاقلارین اور‌ک آغریسی‌دیر یاغیش
ویجدانیمیزی اوتاندیرماق اوچون گؤزلریندن آخیر بولودلارین
و سویولموش دری‌لرین ویترینی‌دیر گؤی قورشاغی
اوتاندیراجاق‌می تانرینی؟
آن گلر
آددیم باشی
باش‌سیز گؤوده‌لرین قافا تاسینا توخانار آیاغمیز
و باشیمیزی پارتلادار
دؤرد یانیمیزدا تاریخ چرچیوه‌سینده دوستاق اولان
عاصی روحلارین باغیرماسی…
دونیانین یوکونو داشییان آطلاس‌لاریق
آغری بیزیم
آجی بیزیم
میللت بیزیم
یالانچی اوموددان آسلانان
یالان گلجک بیزیم
بو کند
بو شهر
بو مملکت
بو کؤره یاشاماق اوچون یاخشی یئر دگیل آما
داشیماق مجبورییتینده‌ییک یئنه
داشیماق مجبورییتینده
داشیماق.
قارغاشا : آشوب
آطلاس : یونان اوسطوره‌لرینده یئر کؤره‌سینی چیگنینده داشییان تانریچا
