فهله‌لر گونونه اتحاف
اسماعیل خرمی

ایشسیز گؤزلریم
دارتینیر چیخا اؤزوندن؛
آراییر اوستونه اولان تاپشیریقلاری.
کوچه وئیسلینه دؤنوب-
ایشسیز دره اوشاقلارین-
ایش آختاردیغی آیاقلار کیمی.

بیر ماهنیدا چیخیرسان یادیمدان؛
چیرپینیر گؤزوم،
اوره‌ییم سارماشیر-
چؤره‌ک آختارانلارین آیاقلارینا.

دؤیونوروک، دؤیونوروک-
هر ایکیمیز
واردان یوخسول ائل آراسیندا.

برکه بوشا دوشوروک
بؤیویوروک، بؤیویوروک
یئنه ایشسیزیک
یئنه آختاریریق؛
نه من باخماقدان قازانیرام
نه سیز یورومکدن.