قوناقلیق مجلسینده اوتورموشام بیرده گؤردوم نه جاندا بیری؛ قد قواره ؛ هئیکل ده منیم هئچ اولماسا اوچ برابریم قول قاناد آچمیش؛ منه ساری گلیر. مات- مات ائله باخیرام اونون لاخلایا- لاخلایا گلیشینه؛ بیردن سونامی کیمین بیر شئی بورودو جانیمی. گؤزونوزدن ایراق پرس اولموشام؛ نفسیم چیخمیر.
بیر ایکی دیقادان سونرا چکیلدی؛ بوغولموش من؛ اوره‌کدن بیر اکسیژن آلدیم. اوندان گوببولتویله اؤزون سالدی منیم اؤنومده کی صندلین اوستونه؛ ائله کی دئدیم ایندی سینار صندل.
– ویییی افروز خانیم نئیه مات- مات باخیرسان؛ تانیمادین؟!
– یوخ مگر قراریدی سیزی تانییام؟!
– حقین واردااا. بؤیوبسن. ائشیتمیشم بؤیوک یازارلا زادلا داها اوتوروب دورورسان، دای بیزی بینمزسن کی.
– باخین موضوع بینمک یوخسا بینمه‌مک دئییل. ائله دوغرودان تانیمادیم.
– مگر سن رحمتلیک زینت خانیمین قیزی دئییلسنمی، اصل‌لریده تبریزدن بیزیم شهره کؤچموش؟
( خئیره بو دئیه سن منیم آبا و اجدادیمی کؤکدن تانییر)
– نئیه اؤزومم
– یاخچی منیم خالام اری سنین بی‌بی‌نین قیزینین نتیجه‌سینین نوه‌سیدیر. باخما ایندی گئت- گل یوخدو؛ اؤزگه اولموشیق.
– دوغرودان بوندان یاخین فامئللیق اولماز. ائله لاپ آرازدان گئچنده مختصر گ..گ دئیمیشیک. گولمگیمی ده زورلا اوددوم.
– یاخشی ایندیکی تانیدین غرض مزاحیملیکدن، منیم بو خالام اری انتخاباتا شرکت ائده‌جک، بودا کارتی. بونون تبلیغ مجلسلرینه گل؛ دانیش؛ شعر اوخو؛ الیندن گلن.بونودا دئییم خالام ارینین دونیا مالیندا زاددا گؤزو یوخ هااا.اونون غرضی یالنیز خیدمتدیر. یوخسا اؤزو دیپلمات‌دیر؛ ایل اونیکی آی آمریکادا؛ آوروپادا گزیر.
قالدیم نه دئییم؛ دوزو ایللردیر بو تووبازلار هر دؤرد ایلدن بیر گلیب بیز یازیغ یازارلارین جیریغ یاخاسین تاپیرلار. منه شعر اوخو. منه سخنرانی ائله. سنده اوزدن اوتانیب گئدیرسن بیر چاققال باشین ائله شیر باشینا اوخشادیرسان اؤزوده عجب ده قالیر یاللعجب من کیمیمیشم اؤزوم بیلمیرمیشم. دای دئمیر شاعیرین ایشی اغراقدیر و قلمینین قدرتین اوزه چکیر. اؤزوده کی اونلار شعر یا هونری اثر دئییل‌لر؛ شعاردیلار و شاعیره یالنیز وقت تلف ائله‌مک. هله درد بوردادیر انتخاباتدا چیخالار یا چیخمایالار؛ رأی گونونون دوز صاباحیسی بئله ایلیم- ایلیم ایتیرلر ایینه ساماندا ایتن کیمین. هئچ آدامی سانکی تانیمیرلاردا.
ائله بیل همن بلدییه‌لرین آلنین؛ فهله‌لرین الین آیاقین اؤپن دئییللر. بلی بونلارین هامیسی دئمه نمایش‌دیر یازیغ کوتله‌نین رأیین ییغماغا.
نه چوخ قوزولار؛ نه چوخ تویوغ- جوجه‌لر بو یوللاردا ناکام اولور. نه چوخ دوگو تلیسلری بوشالیر و نه چوخ منیم کیمین قویونلار یئنه قوردلارا آلدانیر. آمما بو دؤنه آییلمیشام بو قوردلارین هئچ‌ بیرینین فئلینه اویو‌مییاجاغام.
– فیکره گئتدین افروز خانیم؟
لاپدان اؤزومه گلدیم.
– من بو دؤنه هئچ کیمسه‌نی تبلیغ ائتمییه‌جم، بیر رأی واریم اونودا یا وئره‌جم یا وئرمییه‌جم.
بو دؤنه او مات- مات منه باخدی.
– کی بئله. چوخ اؤزونو توتورسان افروز خانیم!
– سیز بئله فرض ائدین؛ گئدین داها بوندان سونرا وئردیگیز روزونی دا؛ مندن کسین لوطفن.
– دئمیشدیلر خبیث آدامسان اه…اه
حیرصلی صندلیدن قالخدی سویو سوزولموش، مندن اوزاقلاشدی.
قوی جهنم اولسون هارای بو باشدان من ده خلقین موفته حامبال نؤکری دئییلم کی آخی. یورولدوم موفته‌سینه اونا بونا جان آتماقدان.
هله یولدادا گلنده ماجرانی حیات یولداشیما دئدیم. باشین تولاییب دئدی:
-افروز یادیندادی آداخلی اولاندا سنه نه وعده‌لر وئریردیم اؤزومو شیرین سالماغا؟ زیارت؛ خاریجه سفری؛ بوللو سوللو قیزیل؛ کیتابینین چاپی و….‌و….‌
-یئنه یاراما دوز سپدین کی؛ نئجه؟!
– هئچ؛ بو فئلباز؛ کاندیدلرینده وعده‌لری بیزه؛ منیم آداخلیقداکی وعده‌لریمه اوخشاییر. نامزد نامزددیر نه فرق ائدیر. رنگلی بزکلی، آمما یالان و ایچی بوش وعده‌لر.