۱- یئددی‌سین؟!..
ای صبا! تئزجه ایمئیل ایله خبر وئر او یارا
شکر اولا آللاها، قیش چیخدی، یئیشدیک باهارا
سوفرادا یوخدور اگر بیر نئچه “سین” غصه‌سی یوخ
یئرینه، یئدیی “سین” ائوده اوتورب هاردان- هارا!
سکینه، سامیه، سلطان باجی، سئودا، سریه
قالیب ائوده، قوجالیبلار، داها سیمین له سارا
ار تاپیلمیر بولارا، ایش ده کی یوخ جامعه ده
ایش‌لری تکجه سوماق سورماق اولوب شام- ناهارا
یئددی “سین” ایسته‌میرم، یئددیجه کوپ سرکه وئرین
تورشامیش قیزلارا بیر چاره قیلیم من بئچارا
بیر نفر رحم ائله‌ییب، ائلچی گله قیزلاریما
حاضیرم من جانیمی اوچ دونه چیرپام دیوارا
کؤچوب اوغلانلاریمیز، هر بیری بیر اؤلکه‌ده‌دیر
پول- چؤرک آردیجا اولموش نئچه میلیون آوارا
“نخبه”دیر، هم ده آلیب شیمی، فیزیک دکتراسی
غرب ده گارسون اولوب، ساعتی اوچ- دورد دولارا
ولی یوخ غصه یئری، گر کؤچوب اوغلانلاریمیز
گئنه افغانلی بیزی نایل ائدیب افتخارا
یاخشی بیر مشتری‌دیر قیزلارا افغانلی جوان
مشهده، تهرانا باخ، گور نئجه چیخمیش بازارا
دوزدو وار خیرداجا بیر عیبی بو افغانلی‌لارین
فرق قویمازلار اولار چوخ خانیم ایله داوارا
نئیله‌مک؟ چون کی “خودی”، هم بیزه “قارداش” ساییلیر
نه اولور “موز” سؤله‌سک بیزده سارالمیش خیارا؟!
گئنه چاشدین سؤزونو، “آرش”! آمان دیر، بس ائله
ساکت اگلش، داداشیم! چوخ دانیشیب، قویما بارا
۲- نولایدی!..
نولایدی، نؤوروز عمی! سن‌ده بوللو رحمت اولایدی؟
بشرلره، داهادا سن‌ده چوخ محبّت اولایدی
«نوئل بابا» وئریر هدیه، سئویندیریر هامی خلقی
کاش اونجا، اؤز ائلینه، سنده‌ده کرامت اولایدی
«اقلیت»دیر او، «اهلِ کتاب»دیر، هم‌ده کی «غربی»
ولی کاش اونجا فقط سن‌ده بیر لیاقت اولایدی
اونون کیمی گئدیب، اوغلان! نه‌دن «کتاب» اوخومورسان؟
نولایدی سن‌ده بیر آز علمه، درسه رغبت اولایدی؟
«پیامِ نور»دا، یا «آزاد»دا، آزجا درس اوخویایدین
«لیسانس» آلاندا، بئکارلیق سنه مصیبت اولایدی!
آلایدین، اوندا بو یول مسندین «وزارت» اولایدی
گئده‌یدین، «اوستاد» اولایدین همان او مدرک الینده
ایشین‌ده چیخسا ایکی، مین رقم حمایت اولایدی
کئچک بو سؤزدن هله، عرض ائدیردیم: آی عمی نؤوروز!
نولایدی سن‌ده بیر آز یوخسولا محبت اولایدی؟
اولوبدو هر دنه‌سی پوسته‌نین، یوزاللی تومن- زاد
کاش آجیله- زادا، بیر عادلانه قیمت اولایدی
گلنده نفت پولو سوفرایا، دولا کاسا- بوشقاب
بیر آزجا شیرینی‌ده- آجیل‌ده اونلا دعوت اولایدی
بئش- آلتی دست‌ده پالتار گئیه‌یدی آرواد- اوشاق‌لار
«تاناکورا»، یادا کی، ترس- آواند قسمت اولایدی
واریم‌دیر آلتی «سین» ائوده، اینانماسان، گل، اؤزون گؤر
اولایدی کاش بیری‌ده، «یئددی‌سین» رعایت اولایدی
«سارا»، «سُمیّه» «ساناز»، هم‌ده «سوسن» ائوده قالیب‌لار
«سمر»ده وار، «سونا»دا، کاش «سوماق» کفایت اولایدی!
بو آلتی تورشامیش، اوددان- سودان هر ایل آتیلیرلار
نولایدی بخت آچیلایدی، بولاردا راحت اولایدی؟
بو «اقتصادی تحول» هایاندا قالمیش، الهی؟
گله‌یدی، یوخسول ایشی اوندا عیش- عشرت اولایدی
«سوبسید»- یمیز اولایدی نقدی، پول یاغایدی یاغیش تک
قیزیل- گوموش‌دن او گون یوخسولا عمارت اولایدی!
ایناندین هر شُعارا- وعده‌یه، سفئه‌له‌دین «آرش»!
کاش آزجا سن‌ده عاغیل، من‌ده چوخلو ثروت اولایدی
