نیگار و یاشار، آتا آنالاری ایله، شهرین ائشیگینده اولان، اگلنجه مئشهسینه گئتمیشدیلر. اونلارین بؤیوک دده و بؤیوک ننهلریده، اونلارلا دولانماغا گلمیشدیلر.
گونشلی بیر گونایدی گویلره اوزانان اوجا آغاجلارین یارپاقلارینین خیشیلتیسی ائشیدیلیردی. آغاجلار، پارکین اویون یئرینین بوتون هنده‌ورینی توتموشدو. عائلهلر پارکا چاتیب چاتمامیش، اوشاقلار یار یولداشلاری، همده باجی قارداشلاری و آتا آنالاری ایله اویناماغا باشلاییردیلار. اویون یئری چوخ بؤیوک بیر یئرایدی و اوشاقلار اونون دورد بیر یانینداکی جور به جور اویونلارلا ماراقلانیردیلار. اوردا فوتبال، آرادا ووردو، پیل – دسته، والیبال، جیزیق اویونو و دیگر اویونلاری اوینایان اوشاقلاری، همده بؤیوکلری گؤرمک اولوردو.
نیگار و یاشار، آتا آنالاری ایله آرادا ووردو اویناییردیلار. اونلارین اویونوندان بیر ایکی ساعات کئچمیش و گونش، گؤیون اورتالارینا چاتمیشدیر. اوشاقلار، آتالارینین اگیلیب – دوزلمهسیندن، اونون یورغون اولماسین بیلدیلر. ائله اونا گؤره، دؤشهدیکلری و بابا ایله بؤیوک مامان اوتوران یئره قاییتماق ایستهدیلر.
بؤیوک مامان، بالاجا گاز چیراغینین اوستونده چای دوزلتمیشدیر. هامی چای ایچدیلر. شیرینیده یئدیلر. اوشاقلارین آتاسی، چای ایچن کیمی، یـئره سالینان دیالین اوستونده اوزاندی و بیر آز کئچمهدن، یوخلادی. نیگار و یاشاردا چایلارین ایچدیکدن سونرا، اوزاندیلار، آنجاق یوخلایا بیلمهدیلر. اونلار هلهده اویناماق ایستهییردیلر.
نیگار دئدی: یاشار اویون یئرینه باخ !
یاشار دئدی: هانسی اویون یئری ؟
نیگار جاواب وئردی: “گؤیلردهکی اویون یئرینی دئییرم. بولودلارین آراسیندا اولان یئری ” و سونرا الیایله بولودلاری گؤستردی. بولودلار گویون اوستونده، اویان بویاندا گؤزه دییردیلر. همده هردن گونشین قاباغینی کسیردیلر.
یاشار دئدی: “هانسی اویون یئری؟ منکی بیر زاد گؤرمورم . . .”
نیگار دئدی: ” اورایا باخ! اورایا! ساغ طرفدهکی بولودو گورورسن؟ زویولداغ دیر . . . “
یاشار دئدی: “هه، دوز دور . . . ائله بیل زویولداق دیر . . . “
سونرا نیگار گؤی اوزونون بیر حیصه سینی گؤستریب دئدی: “اورایا باخ! بؤیوک قار توپو کیمی یئکه بیر چرخیفلک! به به، نهده آغ آبپاق و گؤزل دیر. “
یاشار دئدی: “دوز دئییرسن – بؤیوک بیر چرخیفلک، همده بیرگؤی زویولداغی…”
سونرا نیگار، یاشارین الینی توتوب، چوخ سئوینجله، گؤیون ان شمال طرفینی گؤستهریب دئدی: ” واه واه واه، گؤر نه قدهردیر؟ گل سایاق یاشار! اوتوز بئش دنه گؤزل واوزون کوف!”
یاشاردا دئدی: “اورایا باخ! یاریسیندان چوخودا بوشدور . . . هئچ بیر کیمسهده یوخدور. “
نیگارلا یاشار، گویلردهکی اویون پارکینی گزدیلر و اورانین هر بیر یئرینی بیربیرلرینه گؤستردیلر. اونلار بو ایشدن ماراقلانیر، ایلنیر و فرحلنیردیلر.
نیگار اویان بویانا باخدی. آتا هلهده یاتمیشدیر. آنا ایسه آبابا و بؤیوک مامانلا دانیشیردی. نیگار گؤز آلتیایله اونلاری ایزلهدی. بونلارا باخمیردیلار. سونرا چوخ یاواشجاسینا سسلندی: “خبرچیلر… خبرچی لر؟!”
او طرفلرده، دورد – بئش دنه خبرچی، هاوادا فیرلانیردیلار. دایاندیلار و دئدیلر: هن! نه دئییر؟! بیزه بیزله ایشینیز وارایدی؟! “
نیگار، خبرچیلری اؤزونه ساری چاغیردی و اونلارین قولاقلارینا پیچیلدادی. بیر آن سونرا، نیگار و یاشار، ائله اوزاندیقلاری کیمی گؤزلرینی یومدولار. داها سونرا هرهسی بیر خبرچینین توک کیمی قانادیندان یاپیشاراق، اوجا سسله دئدیلر:
– ” خبرچیلر! خبرچیلر! بویورون. بیز گؤیلردهکی اویون مئیدانینا گئتمهلیییک” و نئچه ثانیه سونرا، داها اونلار اورادا دئییلدیلر. آتا یوخودان دورارکن و آنانین، آبابا و بؤیوک مامانلا دانیشیغی قورتارارکن، اونلار نیگار و یاشارین اورادا اولمادیقلارینی آنلادیلار. دوغرودان سیز بیلیر سینیز نیگار و یاشار هارادا ایدیلر؟!
یک پاسخ
ساغ اولون