ایکی شعر
رقیه عبدیلی (سازاق)
(۱)
یئنی قاناد آچمیش
قوش کیمی‌دی محبت
اوچارکن
بللی اولمور
هارا قونماسی
قوندو
اولدو سئوگی
قالدی
یاشادی
اوچوتدولارسا
اولدو عذاب.
…
یئنی قاناد آچمیش
محبتیم
اوچوب
ـ سنین اوره‌یینه ـ
قونوب
قالیب
یاشاییر!
(۲)
گووه‌نیرم سنه
سرتلنسن ده گوونجیم سنه آزالمایاجاق
«گیزلن تاپیم» اویونوندا، دؤنگه‌لرینده گیزلنیب
گؤزوندن یاییلسام دا
قیشلانیب ساویلسام دا
یازداکی اَبه‌میزه سیجاقلیق بسلییه‌جَیم
سنده ایتگین گئتسمده! سنی گؤزله‌یه‌جَیم
اولدوز دریب، آیینا پای گؤندره‌جَیم
گلسن بایراقسیز گلمه،
اسمَگیم گلیر!…
