کریم حاجی‌زاده‌نین یاشایـیشینا بیر باخیش/ میرعلی سلامت
تبریزین اوستونو، آلیبدیر دومان
آلچاقدیر شاه‌لاردان مرحمت اومان
کریم حاجی‌زاده، بؤیـوک رسام، آکتیور، ۱۳۰۲ شمسی ده، باکی شهرینده، دونیایا گؤز آچدی. ابتدایی تحصیلی‌نین بیر حیصّه‌سینی باکی‌دا اوخودو، سونرا عاییله‌سی ایله تبریز شهرینه گلیب، تحصیلاتـینـی داوام وئریب, ابتدایی تحصیلاتـینی قورتاراندان سونرا، دانشسرایا داخیل اولوب، بیرینجی دفعه اولاراق، دانشسرانـین ماکئتـینی دوز‌لدیب و چوخلو آلقیش‌‌لار قازانمیشدیر و لاپ کیچیک اولان زامان‌لاردان، قلم، رنگ و … رسّام‌لیقلا، ماراقلانمیشدیر.
ایکینجی دونیا محاربه‌سی باشلاناندان سونرا، شوروی حاکمیتی، تبریزده بیر مدرسه آچمیشدیر کی، کریم حاجی‌زاده اورادا، آد یازدیریب و درسه مشغول اولدو. بو مدرسه ده بیر آغـیر پروگرام شرایطه گؤره تدارک گؤرولموشدور. او جومله‌دن، «موللا نصرالدین» روزنامه‌سی‌نین یازیچی‌لاری و جمعی حرکت‌لره بو مدرسه‌ده اوستونلوک وئریلیردی. بو مدرسه، قدیم، عسگر باققال ماغازا‌لاریندا دایر اولموشدو: حاجی‌زاده اؤز همکلاسی «ماکویی»له برابر، «دومانلی تبریز» نمایشینی تاماشایا قویدولار. ماکویی ستارخان رولوندا و کریم حاجی‌زاده باقرخان رولوندا چیخیش ائتدیلر.
بوندان باشقا او شعرلر(تبریزین اوستونو دومان آلیبدی) و مدرسه‌ده مدنی چالیشمالارلا برابر، پیشه‌وری جناب‌لاری‌نـین و آژیر مجله‌سی‌نـین چاپ، یایین و سایر ایشلرینده ده اشتراک ائتمیشدیر.
۲۴ ـ ۲۵ ایل‌لریند‌ن سونرا، تهراندا یاشاییب یئنه ده ۲۹-نجی ایل‌لرده تبریزه قایـیدیب «اداره‌ی فرهنگ»ده استخدام اولور و رسّاملـیق معلمی عنوانـیندا ایشینی باشلایـیر و سونرالار “رآل” آدیندا بیر کارگاه شریعتی خیاوانـیندا برپا ائدیر و اوردا رسّاملـیغی تعلیم ائدیر.
دوکتور خانعلی، سرگرد شهرستانی‌نین الیله میکروفون قارشی‌سیندا وورولاندان سونرا کریم حاجی‌زاده دوکتور خانعلی‌دن، بیر پورتره تصویر ائدیر. دوکتور خانعلی گولـله چیچه‌یی سینه‌سی اوسته، جیبینده قلم، بو حادثه‌نین صاباحی‌سی، «رآل» کارگاهی‌نـین ویترینینه قویولور. چوخلو جاماعات یـیغـیشیر. آخشامی‌سی کریم حاجی‌زاده توتولور، نه کی مجسّمه، تابلو وار… ساواک یـیغـیشدیریر.
بو زاماندان سونرا، تبریزین اوستوندن، بولود کئچنده ده کریم حاجی‌زاده توتولور. آخـیرینجی دفعه، ۵۱-نجی ایلده زندانا دوشور و ۵۷-نجی ایلده خالق طرفیندن آزاد اولور. بئله بیر شرایط حاجی‌زاده‌نـین سیاسی دوشونجه‌لرینی کسکین‌لشدیریر، اونو سیاسی بیر رسّاما چئویریر.
کریم حاجی‌زاده تبریزده مختلف سبک‌لرده، اکسپئرسیونیسم خصوصیله فوتوریزم (ایراندا بیرینجی دفعه اولاراق) اثر یارادیب. فوتوریزمین اصیل مضمونو حرکت‌دن عبارتدیر و رسّام حاجی‌زاده بوتون تابلولاریندا بو حرکتی انقلاب‌لارین تصویر ائـتمه‌سینه چئویریب. اؤرنک اوچون بیر تابلو، «توفاندی نیزاردا» بیر قامیش‌لـیغی تصویر ائدیر کی، قامیش‌لارین بند-بندی حرکت‌ده تصویر اولونور. مختلف مملکت‌لردن اشتراک ائدیلن بیر سرگی‌ده او اثری «۲۹ بهمن، ۲۲ بهمن، حرکت جوهری، قیام کاوه و…» آدلاندیردیلار.
بیر تابلوسودا، «آفریقا قـیزاریر» آدلانـیر کی، بیر فیلیز اوزه‌رینده بیر کرتنکله تصویر اولونور کی، آشاغـیدا گور اوجاق، دیری کرتنکله‌نی قـیزاردیر. مختلف نظرلر سرگی‌ده بو تابلو باره‌سینده آرایا گلدی.
کریم حاجی‌زاده، یاشایـیشی و یاشاییشی‌نـین تأثیری او قده‌ر گوجلو اولموشدور کی، ایندی ده ذهن‌لرده یاشایـیر. قـیساجا، چوخ فشار آلتـیندا اولاندان سونرا «رآل کارگاه» دفترینی سحر ساتـیب، آخشام چاغی، شهناز خیاوانـیندا اونون پول‌لارینـی پایلامیشدی. کریم حاجی‌زاده ۶۷-نجی ایلین آبان آیی‌نـین ۱۳-نده دونیاسینی دییشدی.
اونون حؤرمتلی قارداشی صابر، حاجی‌زاده‌نـین درین دوشونجه‌لی، چوخ تأثیرلی خاطیره‌لریندن دئـییر:
«بیر گون کریم منه دئـدی کی، آتیله‌ده منیم قوناغـیم اولاجاق، منه گل کؤمک ائله. من، مئیوه‌دن، چای و سایره حاضیرلا‌دیم. من اؤز ایشیمله مشغول ایدیم کی، ابولحسن خان اقبال آذر داخل اولوب، خوش- بئش‌دن سونرا سوروشدو کی، اوستاد هاردا؟ جواب وئریلدی کی، گلر. نئچه دقیقه سونرا آغ کؤینک، کراوات، قارا کوت چییـنـی‌نـین اوستونده اوستاد شهریار داخل اولدو. ایسته‌نیلدی کی، حیدربابادان اوخوسون. آدی اوره‌ک‌لرده یازیلـیب، قازیلان اوستاد، حیدربابادان اوخودو و اقبال آذر جناب‌لاری، ترنّوم ائـتدی. سونرا ایسه کریم حاجی‌زاده، حیدربابا داغـی‌نین اته‌یینده‌کی قویون- قوزولاری، چوبانی و شهریاری همان هئیت‌له اولدوغو کیمی تصویر ائـتدی.
یک پاسخ
آیا عکسی از تابلو ها ندارید که در اینجا ببینیم