غم- غصه‌دن کؤنول اولا آزاد، نه عیبی وار؟
تار- دونبه‌کین سسی ایله اولا شاد، نه عیبی وار؟
اوچ یوزمین ائتدیلر- بالا!- بایراملیغی بو ایل
لاپ بال کیمی آغیزدا وئره داد، نه عیبی وار؟
آییلیق‌لار آرتیری یوزه اون بئش ایل اوّلی
خرج‌لر چوخالسلار یوزه هشتاد، نه عیبی وار؟
یارانه‌لر کسیلسه، داها سوبسید اولماسا
ایل اویناییب، دئیه: «مبارک باد!» نه عیبی وار؟
هر بیرزادی بیزه ساتیری باشقا اؤلکه‌لر
ایران‌دادا یاپیلسا بئش- اون زاد، نه عیبی وار؟
«خسرو» اولانمادیق، بیزه «شیرین» اولا نصیب
یوخسول‌لار اولسا دونیادا «فرهاد» نه عیبی وار؟
مجلس، ایکینجی ازدواجی تصویب ائیله‌ییر
ثروتلی‌لر اولا گئنه داماد، نه عیبی وار؟
هر ایل آلیر تزه آرابا، چوخ‌دا پوزلانیر
لُطف ائتسه، آلسا ایل‌ده بیر آرواد، نه عیبی وار؟
یوخسول اولاندا چوخ اوجا بوی، «دایلاق» آدلانیر
پوللو، دئییلسه «سرو» یا «شومشاد»، نه عیبی وار؟
ایش یوخدور، ائو- ائشیک‌ده، اودور ائولنه‌نمه‌ییر
قوی ظنّ ائده جوان اؤزون آزاد (!) نه عیبی‌ وار؟!
بیر انتقاد یازانماییریق قدرت اهلینه
اونلار بیزه توتورسا مین ایراد، نه عیبی وار؟
کاندادیدالیق‌دا سؤز وئریب اؤلکه‌ آبادلانا
ایندی وکیل، ائدیر ائوین آباد، نه عیبی وار؟
چوخ شاعر ائتمیش ایش- پئشه ایندی مدیحه‌نی
«آرش» بو اورتادا اولار نقّاد، نه عیبی‌وار؟