ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4

zelzele-azarbaijan-4
قاراداغدا تؤره‌نن زلزله فلاکتیندن بیر ایل کئچدی…
آذربایجانین ادبی- مدنی درنک‌لری‌

عزیز و حؤرمتلی وطنداشلار!, دیرلی مدنیت خادیملری!, سئویملی قلمداش‌لار!

 بیلدیگینیز کیمی قاراداغدا باش وئرن زلزله‌دن بیر ایل کئچدی. او دهشتلی گونلر کئچمیشه قوووشسادا, آنجاق هله‌ده وار او فاجیعه‌نین آغری‌لاری, آجی‌لاری, کابوس‌لاری قاراداغلی‌لارین جانیندان چیخماییب. اونلار هله‌ده اؤز دردلرینی یاشاییرلار. آنجاق بیر شئیی اونوتمامالی‌ییق کی اگر خالقیمیزین و انسان‌سئور انسانلارین , مدنی و غیر دولتی گروپ‌لارین و غیرتلی وطنداشلاریمیزین معنوی و مادی یاردیم‌لاری اولماسایدی, بو آغری آجی‌لار, بو  فلاکتین تؤرتدیگی زیان‌لار یقین کی قات- قات آرتیق اولاجاق‌ایدی.

بیز آذربایجان ادبیاتی و مدنیتی ساحه‌سینده چالیشانلار, زلزله‌نین ایلک ساعاتلاریندان بو گونه قده‌ر اؤز وطنداشلیق و انسانی بورجوموزو اؤده‌مک اوچون الیمیزدن گلنی اسیرگمه‌میشیک. بیرینجی چاغیریشیمیزدا دئدیگیمیز کیمی بو آجیناجاقلی فاجیعه‌نی اؤز فاجیعه‌میز بیلمیشیک؛ دردلی‌لرین دردینه اورتاق اولماق ایسته‌میشیک و انسان سئور، وطن سئور، ائل سئور انسانلارلا برابر زلزله‌دن ضرر گؤرموش انسانلارا کؤنوللو یاردیم ائتمگه چالیشمیشیق. ایستر یارالی‌لاری مداوا ائتمکده, ایستر ائو- ائشیکی داغیلانلارا سیغیناق قورماقدا, ایستر جنسی و مالی یاردیملاری توپلاییب زلزله وورموش منطقه‌ده فعالجاسینا اشتراک ائدن امکداشلاریمیزا و اطمینانلی یاردیم گروپلارینا چاتدیرماقدا یاخیندان اشتراک ائتمیشیک. آنجاق بونلارلا کیفایتلنمه‌میشیک. اوشاقلارا, قوجالارا و قادینلارا یاردیم مقصدیله قورولموش گروپلارین, زلزله وورموش منطقه‌لرده تعلیم تربیه, صحیه و مدنی اوجاقلاری قورماق ایسته‌ین یاردیمجی مدنیت و صنعت گروپلاری‌نین مصلحتچیسی اولموشوق؛ اونلارلا زلزله منطقه‌سینده گؤره‌جکلری ایشلرین اوصولجا گئدیشاتی باره‌ده امکداشلیق ائتمیشیک. بونلارلا یاناشی زلزله‌ده ضرر چکن انسانلارین دردلرینی آزالتماق, معنوی و مادی یاردیملارین اونودولماماسی و بو فاجیعه‌نی هم‌وطنلریمیزین گونده‌مینده ساخلاماق مقصدی‌له,  مجلیس‌لر قوروب, مراسیملر کئچیرمیشیک. بو ایشلر ایندیده داوام ائتمکده‌دیر و اینانیریق کی بونلاری لاییقینجه یئرینه یئتیره‌جه‌ییک.

عزیز دوستلار!

بیز بیر داهادا زلزله‌ده ضرر گؤرموش و دوغمالارینی ایتیرمیش وطنداشلاریمیزا دؤزوم دیله‌ییریک و ایراندا یاشایان خالقلارا و بو فاجیعه‌ده آذربایجانین ایمدادینا چاتان بوتون انسان سئور هم‌وطنلریمیزه عشق اولسون دئییریک؛ اونلارین قارداشلیق اللرینی سیخیریق و  بوتون خالقلاریمیزا گؤزه‌ل گونلر آرزولاییریق.

گون او گون اولسون کی زلزله وورموش منطقه‌لرده تیکیلن صحیه, تعلیم تربیه و مدنی اوجاقلاردا سئوینج و سعادت نغمه‌لری اوجالسین؛ خالقیمیز خوشبخت یاشاسین.

21 مرداد 1392

آذربایجان ادبیات اوجاغی – تهران

ایشیق سایتی(آذربایجان ادبیات و اینجه صنعت سایتی) – تهران

یئنی تبریز ادبی انجومنی – تبریز

چنلی تئل ادبی انجومنی – میانا

قاراداغ ادبی انجومنی – تهران

شیدا ادبی انجومنی – شهریار

صابر ادبی انجومنی – تهران

ساهر ادبی- مدنی درنه‌یی- تهران

نباتی ادبی انجومنی – شهریار

دده قوربانی ادبی انجومنی – تهران

انجمن ادبی صبا – مشهد

پاسخی بگذارید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *