«نادره برماس» حیاتلا ابدی‌لیک وداعلاشدی

«تبریز آرت»ین یایدیغی خبر اساسیندا، چوخ تاسفله تبریز شهری‌نین تانینمیش و سابقه‌لی تئاتر اویونجوسو نادر خانم برماس بیر نئچه آی خرچنگ آزاریندان اذیت چکدیکدن سونرا دوشنبه گونو شهریور آیی‌نین دؤردونجو گونو حیاتلا ابدی‌لیک وداعلاشدی.
«نادره برماس» عائله‌سی عمومیتله صنعتکار بیر عائله اولوب، حیات یولداشی جناب شهرام خزرائی و ایکی ائولادی دا آذربایجانین تانینمیش و استعدادلی صنعتکارلاریندان ساییلیرلار.
«نادره برماس» ۱۳۴۸نجی ایل تبریز شهرینده دونیایا گؤز آچمیش، ۱۳۷۰نجی ایل تجربی علم‌لری اوزره دیپلم آلمیش، سونرالار قیسا فیلملر رئژیسورلوغو اوزره اختصاصلانمیشدیر.
ایفا ائتدیگی صحنه اثرلریندن «حیدربابا یه سلام»، «خانه در باد»، «آبی سرخ»، «آوازه خوان طاس»، «شبانه» و …چکیلدیگی فیلملردن «سارای» فیلمینی آد آپارماق اولار. صنعتکارین سون اثری اؤز اوغلو «پوریا خزرایی»نین رئژیسورلوق ائتدیگی«کبوتری ناگهان» آدلی نمایشده اویونو اولموشدور.
نادر برماس ۱۳۷۹نجی ایل «شبانه» آدلی نمایشده گؤستردیگی صنعت اوچون شرقی آذربایجانین جشنواره‌سیندن قادین اویونجولارینین ایکینجی مکافاتینا لاییق گؤرونموشدور.
«ایشیق» – آذربایجان ادبیات و اینجه صنعت سایتی آذربایجانین گؤرکملی صنعتکاری نادره خانیم برماس‌ین حیاتدان ابدی‌لیک آیریلماسینی اونون حؤرمتلی صنعتکار عائله‌سینه، دوست- تانیشلارینا، صنعت یولداشلارینا تسلیت دئییر و صنعتکارین خاطره‌سینی عزیزله‌ییر.

«ایشیق» – آذربایجان ادبیات و اینجه صنعت سایتی
۱۳۹۸/۰۶/۰۵