0,,4968198_4,00

زارافات
آنتوان چخوف
فارسجادان چئویرن: احمد عسگرپور

گون اورتا چاغی، قیشین کسگین سویوغوندا نادنکا قولوما سؤوکندی. دوداقلاری اوسته تازا گؤیرمیش توکلر بوز باغلامیشدی. بیز بیرلیکده اوجا تپه‌نین اوستونده دایانمیشیق. دایاندیغیمیز یئردن تپه‌نین آشاغیسینا قده‌ر، هامار ائنیش یئری، گونش شاخدیقجا گوزگو کیمی گورسه‌نیر. بیزه یاخین بیر عنابی بویالی مخمله بورونموش سوروتمه واردی.

تمناسیز دئییرم: نادژداپتروونا ، گل بیرلیکده  سوروتمه ایله آشاغییا سوروشک. تنها بیر کره. اینان کی ساغ قالاریق. نه ایسه نادنکا قورخور. قاباخدا اولان اوچورومدان قورخور. آیاغیندا اولدوغو گالوشلارین اوجوندان، باش گیجلدن، انتهاسیز اوچورومدان قورخور. تپه‌دن آشاغی باخاندا، قورخودان سینه‌نده نفسین کسیلیر. ندنسه من نادنکانی سورشمه‌یه چاغیریرام، فیکره دالیرام کی او اؤزون اوچورومدا گؤرسه نه احوالات یارانار ؟ اؤلمه‌سه‌ده، دلی اولار!!.

نادنکایا دئییرم کی قورخما سنده اولان بو وحشت قورخودان و اوره‌کسیزلیک‌دندیر. نهایت نادنکا راضیلاشدی. اوزوندن بللی‌دیر کی اؤلوم باهاسینا تاپشیریغیمی قبول ائله‌ییب. رنگی قاچمیش پوزغون، تیتریه‌چک حالدا سوروتمه‌ده اوتوردوق. قوللاریملا قوجاغلادیم و سوروتمه ایله بیرلیکده تپه‌دن آشاغییا سوروشدوک. سوروتمه سورعتله یولا دوشمکده، باش گؤزوموز. سویوق یئل سانجیردی. قولاقلاریمیز یئلین سورعتیندن فیشیلداییردی. ائله بیل آجیمادان بیزی سانجیردی. یئلین کسگین ایتیلیی، ایسته‌ییردی باشیمیزی بدندن آییرسین. یئلین کوشولتوسوندن نفسیمیز گئری قاییدیردی. ائله بیل شیطان بیزی جهنمه آپاریردی. یان یؤوره ده هر نه وارسا رؤیا کیمی گؤز اونونده سورعتله قاچیردیلار… ایندی …. ایندیسه آرادان گئتمه‌لییک ! من یاواشجا نادنکانین قولاغینا ، سؤیله‌ییرم …نادنکا سنی سئویرم .

گئتدیکجه سوروتمه‌نین سورعتی آزالیر. یئلین باغیرتیسی و بوزلارا ده‌یدیبی های-کوی داها قورخونج دئییل. تپه‌دن سوروشمه سونا چاتدی. نادنکا رنگی قاچمیش اؤلولره بنزه‌ییر. رنگی قاچیب، آغ آپپاخ گچ کیمی اولوب. آغیر- آغیر نفس چکیر.

یاردیم ائتدیم سوروتمه‌دن ائندی. آیاغ اوسته دایاندی. ایری سورغون گؤزلریله منه باخدی. دئدی: بو آغیر، قورخونج تجروبه‌نی داها ایسته‌میرم تکرار اولسون! هئچ قیمه‌ته! آز قالمیشدی قوزخودان اؤلم! حال و رنگی اؤزونه گلمه‌ده، سورغون باخیشلارین منه زیلله‌دی. اینجارسیز حالدا گؤزله‌ییردی کی من او اوچ کلمه‌نی دئمیشم یا او اؤزی یئلین های-کویوندن تو‌هومله‌شیب؟ منسه چوخ قانی سویوق آداملار کیمی کناریندا دایانمیشدیم. پاپیروز چکیردیم و دقتله اللرینه باخیردیم.

نادنکا قولون قولوما سالدی. تپه‌نین اته‌یینده دولاندیق. معلوم حالدا اونون خاطیری، او اوچ کلمه‌دن، کدرلنمیشدی. سورغوسو اوچ کلمه‌نین ائشیتمه‌سینده ایدی کی، دئییلیب یا یوخ؟ بو سورغو سعادتلی، شرفلی، و کرامت نفسلی یاشاییشدیر. اهمیته لاییق یاشاییش سورغوسودو. نادنکا صبیرسیز، توتغون و جاذیبه‌لی باخیشین اؤزومه تیکیب و منیم سؤزلریمه، ده‌یرسیز جاوابلار وئریردی. تله‌سیردی اصلی سؤزه باشلاییم.

دوزون ایسته‌سز، ملاحتلی سیماسیندا، هیجانلی و شوور احساسلی باخیشلاری واریدی. ایسته‌دی مندن سوروشسون یا منه دئسین. سؤزلری دیلینین اوجونا گلمیردی. قورخولو خجالت چکیردی. شاد اولمادان دیلی توتولموشدور. …….منه باخمایاراق سؤیله‌دی. بیلیرسیز من نه ایسته‌ییرم ؟

یوخ بیلمیرم!

گل بیرلیکده بیر کره ده …سوروشک.

تپه یولونو یوخاری چیخدیق. تپه‌نین زیروه‌سینه یئتیشدیک. رنگی قاچمیش نادنکانی تیتترک حالدا سوروتمه‌یه میندیردیم. تپه‌نین آشاغاسینا سوروشدوک. بو یولدا یئنه‌ده یئل کوشولده‌ییب باغیریردی. سوروتمه سسله‌نیردی. یئنه‌ده سوروتمه‌نین سورعتله، هیجانلا سسلنمه‌سی نادنکانین قولاغینا، ترنم ائدیردی کی “سئویرم سنی نادنکا”!

سوروتمه دایاناراق، سوروشدویوموز تپه‌یه باخدی. سونرا نئچه آن‌لار اوزومه دیره‌شدی. اینجارسیز سویوق سؤزلریمه قولاق آسدی. انتهاسیز حیرت، هر شئیه ، هر شئیه، بورکونه، الجک‌لرینه و ظرافتلی اندامینه کؤلگه سالمیشدیر. باخیشلاریندان بللی‌دی‌کی اؤزوندن سوروشوردو: نئجه اولسون؟ به او سؤزلری کیم سؤیله‌میشدی؟ او یا منیم خیالیم؟

بو حیران قالماق اونو نیگران و حوصله‌سیز ائله‌دی. یازیق قیز داها منیم سؤزلریمه جاوابسیز قالدی. چاره سیز آز قالدی آغلاسین. سوروشدوم ایسته‌میرسیز ائوه قاییداق؟ قیزاردی، دئدی آمما، آمما منیم سوروشمه اویونوندان خوشوم گلدی.  ایسته‌میرسیز داها بیر کره ده سوروشک؟

دوزدورکی سوروشمکدن خوشو گلیردی، امما کئچمیش دفه‌لر کیمی سوروتمه‌ده اوتوراندا رنگی قاچدی. هئیکلی تیتره‌دی. نفسی قورخودان تنگه گلدی.

یئنه‌ده اوچونجو دفه سوروتمه تپه‌نین اوچوروم آشاغاسینا یوللاندی. گوردوم گؤزلرین تام احساسلا دوداغلاریما زیلله‌ییب. جیبیمده اولان دسمالی باسدیم. آسقیردیم. تپه‌نین سورعتلی بئلینده، کیچیک فورصتده قولاغینا سؤیله‌دیم “سئویرم سنی نادیا”!

حیرتلی. ائله تاپماجالی حیرتده قالدی. نادنکا سوسموش حالدا فیکره دالدی…. اونو ائولرینه قده‌ر مشایعت ائله‌دیم. چالیشیردی یاواش گئتسین. آددیملارین کیچیک کیچیک گؤتوروردو. هر آندا انتظار چکیردی او “اوچ سوزو” منیم آغزیمدان ائشیتسین. گؤردوم کی اینجییه‌رک چالیشیر اوره‌ک سؤزون دئمه‌سین: او سؤزلر یئلین سؤزلری دئییلدی !!؟؟ کؤنلوم ایسته‌میر او سؤزلری یئلدن ائشیدیم!

داها سحر چاغی، نادنکادان کیچیک مکتوب الیمه یئتیشدی. یازمیشدی، بوگون ایسته‌سن سوروشمه اویونونا گئده‌سن، منی‌ده اؤزونله آپار.

او گوندن بری، هرگون نادنکا ایله بیرلیکده  سوروشمه اویناردیق. هردفه یئلین باغیرتیسیندا تپه‌دن آشاغی سوروشنده قولاغینا سؤیله‌ردیم. سنی سئویرم نادیا !

نادیا سونرالار بو اوچ سئودالی سؤزلره ائله بیل چاخیرا یا مورفینه معتاد اولان کیمی، وورغون اولدو کی  یاشاییشی او اوچ کیچیک سؤزلری ائشیتمه‌ده آجی و زهه‌رلندی. هله ده تپه‌نین یوخاریسیندان سوروشمه‌یه قورخوسو واریدی. آمما قورخونون اوزی، سئویملی اوچ کلمه‌سینین اوستو اؤرتولو اولمادان، اونو اینجیتدیردیگی حالدا، لذتله سیخ باغلیدی.

بورادا نادنکا ائله منه و یئله شوبهه‌لیدی. بیلمیردی کی اونو من سئویرم یادا یئل سئویر. آمما نظره بئله گلیردی کی ایندی اونا فرقی یوخدور. اؤنملی اونون سرمست و واله اولماسیدیر. ایندیسه مهم دئییلدی که بو سرمستلیک هانسی باده‌دندیر؟

بیر گون، گون اورتا چاغی، تک‌لیکده سوروشمه یئرینه گئتدیم. جاماعات آراسیندا نادنکانی گؤردوم. او تپه‌یه ساری گئدیردی و گؤزلریله منی آختاریردی ….قورخا قورخا تپه‌نین یوخاریسینا چیخدی. تکجه سوروشمک چوخ قورخولویدو! رنگی آغارمیش قارا بنزه‌ییردی .

باشدان آیاغا ائله تیتره‌ییردی کی، ائله بیل دار آغاجینا طرف گئدیردی. بئله‌لیکله قافاسینا باخمادان تپه‌نین اوستونه یوللاندی. بللیدی کی نهایت ایسته‌یی بودور کی آیا منسیز، او شیرین حلاوتلی سؤزلری ائشیده بیله‌جک یا یوخ؟ گؤردوم آغارمیش سیماسیله، آغزی آچیق، قورخودان سوروتمه‌ده اوتوردو. گؤزلرین یومدو. همیشه‌لیک یئرله وداعلاشدی و سوروشدو … سوروتمه‌نین قورو غیژیلتیسی قولاغیمدا سسلندی. بیلمه‌دیم او آندا اوچ سؤزو ائشیتدی یا یوخ. سوروشمه قورخوسو اونو بوروموشدو و سس ائشیتمک ایمکانین اوندان آلمیشدیر.

عاقبت یازین ایلک آیی یئتیشدی. گونون ایشیغی چوخالدی. داغلارین قاری ارییب سویا دؤندو. داغلارین باشی تورپاغا چالدی. داها تپه‌نین سوروشمه‌سی قورتاردی. یازیق نادنکا داها او هیجانلی سؤزلری ائشیده بیلمه‌یه‌جک. داها کیمسه یوخ او سؤزلری تکرار ائله‌سین. چونکو یئلین اسیب پیچیلداماسین داها کیمسه ائشیدیلمز اولوب. من تله‌سیرم پئترزبورگا گئدیم. بیلینمز اوزون زامانا قده‌ر. شوبهه‌سیز  همیشه‌لیک.

ایکی گون گئتمه‌دن اوول گون باتان چاغی ائویمیزین باخچاسیندا نادنکاگیلین قونشولوغوندا اوتورموشام. هاوا هله بیر آز سویوقدو. زیل پئیین قالانماسی یاخینلیغیندا هله قار گؤرسه‌نیر. آغاجلار هله آییلماییبلار. نه ایسه یازین قوخوسو هله حیس اولور. زاغچالار گئجه یاتاق لوواسی اوسته های- کوویله چیرپیشیرلار.

ائویمیز نادنکاگیلین ائویندن کرباس پارچاسیلا آیریلمیشدی. یاواش یاواش کرباسدان اولان دووارا یاخینلاشدیم. اوزون زامان پارچانین دئشییندن باخدیم. نادنکانی گورورم، ایوانا گلدی. کیچیک کدرلی و غملی باخیشلا گؤیه باخدی. یازین سرین نسیمی نادنکانین بوزارمیش، کدرلی توتغون سیماسینا اسیردی. نادنکا تپه‌دن اسن کوشولتو یئلی و سئویملی، اوره‌یه یاتان نئچه سؤزلری یادا سالیردی. نادنکانین سیماسی توتولدو. چوخ حزین حالدا، بیر داملا گؤز یاشی اوزونه آخدی. یازیق قیز اللرینی قاباغا آپاردی. دئییرسن کی یئلدن حسرتله ایسته‌ییر کی او سئویملی سؤزلری بیر داها اونون قولاغینا سؤیله‌سین. بو آندا من یئلین اسمه‌سیله یاواش سسله‌دیم: نادیا سئویرم سنی.

ایلاهی !! نادیا نه حالدادیر!؟ قیشقیریر. اوزو غنچه کیمی گول آچیر. اللرینی داها شووقله یئله طرف اوزادیر. نه قده‌ر خوشباخت، نه قده‌ر گوزه‌ل؟!

من قاییدیرام ، یولا دوشوب گئتمه ‌یه حاضیرلاشیرام ….

ایندی اوزون زاماندی بو ماجرادان سوووشور. نادنکا ائوله‌نیب. بو کی اونو زورلا اره وئردیلر یا کی اؤز سئودیگینه گئتدی اؤنملی دئییل. اونون اری دولتلی موسسه‌نین باش مودیریدی. اوچ اوشاغی وار. یئنه ده یئل، نادنکانین قولاغینا چاتدیران سئویملی سؤزلر: “من سنی سئویرم”  یاددان چیخماییب.

بوسئویملی سؤزلر اونون خوشباختلیق، جاذبه‌لی و گؤزه‌ل خاطیره‌لی یاشاییشیدیر.

منسه یاشا دولدوقجا داها بیلمیرم نییه بو سؤزلری دئییردیم ؟ نییه زارافات ائدیردیم!!!

ایضاح:

فارسی دیلینه چئویرن: سیروس ذکاء

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4