شعرلر
آنیر قوجام

(۱)
اوخویا بیلمیرم سنی
اودور قایغی‌دان قابار چالیرام
بو‌هانکی چالغی‌دیر
چالینیرمی‌گؤزلرینده.

دویا، دویا، دویا بیلمیرم
گؤرورم، گؤرورم، گؤرورم سنی
تانیماق، اؤیرنمک هوسیله ده
یانیرام، یانیرام
اؤیره‌نه بیلیرم آخ …
هئی … اؤزگه‌لشیرسن
اوزگه‌لشیرسن آن با آن.

اودور جنونام
چیلغینام اودور
زنجیرده‌دیم
ندن، ندن …
اوخویا بیلمیرم،
اوخویا بیلمیرم سنی!

(۲)
ائوینه چاتان اولمادی
هامی‌لار کوچه‌لرده اؤلدولر
هئچ اوجاقدان توستو
بیر بوجاقدانسا چیراغ
گؤرونمه‌دی !
ائولر وارمیشسادا
باخدیق قاپی‌سیز، ماکت‌دیلر.

پلاستیک قولچاقلار قالاندی
زیبیل قابلارینا
و نه محبت و سئوگی لنتالاریدا

اتومبیل آیناسیندان ساللانان
قیزیل اوزوملر پاریلداییر…

و بوتون جادالاردا گئدنلر
آیاق یالین، باش آچیق
آج و سوسوز ….
هامی‌لار کوچه‌لرده اؤلدولر …!

(۳)
بیر نئچه تاملی شعیرلریم ایتیبدی
منیم گومانیم خیالینا گئدیبدیر

بیر نئچه گوندور
داشلانیرام یوخودان
خیال ایزین بیزیم قاپی‌دا …
بیتیبدیر .

بیر نئچه گون … قاباقلار …
آچدیم دفتری توخویام شکلینی
ساچیندان عطیرلی بیر تئل
اوردا گؤزومه دگیبدیر

بیر نئچه او شعرلر … یئرینه
گؤزوم سندن گؤزلرینی اوموبدور
بو غمیندن قوجام
گنجلر تکین یامان جوموبدور

بیر نئچه‌سی دئییبلر؛
چیخیب خیالیی،
خیالینا گئدیبدیر…!