کرمی لال داغ
انصار قاراداغلی

له‌له‌سی بیلال داغ‌، کرمی لال داغ
یادداشت دفترلری سووال-سووال داغ
قلبین یامان دولوب‌، آغلا بوشال‌، داغ
ذیرونده دیز چؤکوب یازیلی دومان
بو ایلین یازیسیز-قلمسیز،آمان!

خارابا شهر اولموش سنی دوغان کند!
گؤیلری آزدیرمیش ساحیر بیر دربند!
یالانچی آغریلار تانریلارا فند!
اؤزونه بیر درس سن‌، بیزه امتحان
بو ایلین یازیسیز-قلمسیز،آمان!

عصیرلر گلین تک کؤچ ائدیب گئدیر
بیلمیریک کرم می‌، له‌له‌، توی ائدیر؟
هاوالار توتئیی دیل -دیل کیریدیر!
خط-خط سارا یازیب-پوزموش خان چوبان
بو ایلین یازیسیز-قلمسیز،آمان!

حالال اولدوزلارا، لال اولدوزلارا
گؤیویله چکیلمیش هر بیری دارا
به‌، دار آیاغیندا‌، باخ‌، بیر آی پارا
اونو رسم ائتمه‌یه احوالین یامان
بو ایلین یازیسیز-قلمسیز،آمان!

سنین گؤزلرینده آللاه گؤز یاشی
آغلا‌، اورکلره گؤز یاشی داشی
او دلبر قلم قاش‌، قلمی ناشی!
سیلینمیش قیبله‌دیر یازدیغی آذان
بو ایلین یازیسیز-قلمسیز،آمان!

داش آللاه یونتاییر او لال آذانچی
بیلمیر قیوریم اولسون، تئل به تئل، ساچی!
عشقی‌یله چیرپیشیر‌، یوخدور هاراچی
یونوب-یونتادیغی تانری تیلیت قان!
بو ایلین یازیسیز-قلمسیز،آمان!

یانیق کرمی‌دن کول قالمیش‌، نه کؤز!
گونلر له‌له‌سیزدیر‌،زامان کرمسیز!
مسلمان دا اولسا او ائرمنی قیز
نه اینجیل ختم ائتدی‌، نه یازدی قرآن
بو ایلین یازیسیز-قلمسیز،آمان!

بو اودو یاخانین اوجاغی سؤنسون
چیراغی نور با نور درده بورونسون
دا هنری وارسا‌، دانیشسین – دینسین!
نه نسخه‌لر یازدی‌، نه بوکدو درمان!
بو ایلین یازیسیز-قلمسیز،آمان!

اوقیانوس الی‌یله بیلیرسن آیا –
بولاق درمان تاپیر‌، درد ایچیر دریا؟!
اگر صیفر آرتیرسام سون رقم – سایا
ریاضی-هندسه سون تاپار‌، همان؟
بو ایلین یازیسیز-قلمسیز،آمان!…
۹۶/۳/۱۳

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4