موغام اؤلدو موغان!
نصار قره داغلی

شاعیر «موغان‌اوغلو»نون روحونا اتحاف

بیلمه‌دیم شور ایله زابل‌دا موغام اؤلدو، موغان!…
بیر موغان ‌اوغلو دئدی: یوخ کی همان اؤلدو، همان!
ساوالان مجلیسینه قارلی سهند آتلی گئدیر
خزرین قوللاری اوستونده دومان اؤلدو، دومان!
سارا قان قیرمیزی گئیمیش؛ نه قالیر چیلله‌میزه؟
دان سؤکول، سئحرآما قوینوندا چوبان اؤلدو، چوبان!
آل گئیینسن نه اولار ای قارا کؤینکلی آراز!…
یئنه انسان دیله‌ییله ساوالان اؤلدو، جاهان!
بو ائلین یور – یوماغیندا هنر آشفته گلین!
سازا باش ساغلیغی سن وئر بالابان، اؤلدو اوزان!
دم توتوبلار قارا سازلار قاراداغ صؤحبتینه
بیله‌لر هانسی حسین، هانسی جاوان اؤلدو، جاوان!
گونشی قیبله‌یه کافر – دئیه، قافقاز آپاریر
ناری سیندیرما سحر چاغی زامان اؤلدو، زامان!
توتمادی باخ کی آذربایجانیمین دوز – چؤره‌یی
قاری فارسی، قلم آغزیندا بیان اؤلدو، بیان!
جاناماز آچمیش آراز اوسته آیین سئوگیلیسی
کیمدی تکبیر چکه “انصاری” آذان اؤلدو، آذان!…
۹۵/۹/۲۵

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4