riyahifar
سازاق
میرحسینقلی ریاحی‌فر(سیّد)

پاییزین گلیشی گؤستردی اؤزون
آغاجلاردان کوسور یارپاقلار ایندی.
قولاغینا گلمیر مله‌مه سسی
سوروسوز داریخیر یایلاقلار ایندی.

سحردن آخشاما یئللردیر اَسَن
یایین ایستیسیدیر تورپاقدان کوسَن
قارا دومانلاردیر داغ یولون کَسَن
گؤرونمز اولوبدور اوزاقلار ایندی.

آیاقلار آلتیندا اینله‌ییر یارپاق
قارغا قوروغودور لوت اولان بوتاق
آلیبدیر قوینونا کؤزلری اوجاق
قیزاردیر یاناغی سازاقلار ایندی.

پاییزی دویانلار مین فیکره دالیب
یاشاییش اوستونه غم کؤلگه سالیب
بالتادان اورمانلار یارالار آلیب
یئر گؤیو قابساییب یاساقلار ایندی.

شله چوخ آغیردیر بوکولوب بئللر
سینه‌لر داغلیدیر آغاریب تئللر
«سیّد»م یازیرام اوخوسون ائللر
یامان گونه قالیب اویاقلار ایندی.