دولارآباد خاطره‌سي!
حمید آرش آزاد

اولدوزلا ايشيم يوخ، سايارام بنده دولاري
سايديقجا توكنمير، گئنه اولموش گئجه، ياري
«مستكبر»‌ايديم، سونرا آديم اولدو «مُرفّه»
آد تعيين ائديبلر داها «سرمايه‌گذار»‌ي
البته مني چوخلو حمايت‌ ائله‌ين وار
بول قدرتي، كئچگين سؤزو، هر امري‌ده جاري
يوخسول اوره‌يي سينسادا، سينسين، نه غميم وار؟
قيمت‌لري برك- برك قوروياق سينمايا باري
سينسين فقيرين دام- ديره‌يي، قول- قيچي، نئيليم؟
ماتم توتارام كؤينه‌ييمين سينسا آهاري
ويلام- ساراييم اولسون آباد اؤلكه‌ده، بس‌دير
غم يوخ آتامين‌دا خراب اولموشسا مزاري
ياتميش هامي، بير من اوياغام، بيرده‌كي بختيم
قوربان اولوم اؤز بختيمه‌كي، چوخدو چيخاري
من موز تپه‌رم قارنيما، نارگيل، آناناس‌- زاد
پولسوزدا سوخا قوي گؤزونه، تاپسا خياري
طاووس دوشونو، خاوياري مئيل ائده‌رم من
خلقينده ياوان سنگك اولور شام، يا ناهاري
من ائوده «جگوزي»، «سونا»، «استخر» قاييررام
ائل تشنه قالار، قالخسا سويون نيرخي يوخاري
بير پوللويا، مين يوخسول اولوب قوربان ازلدن
احسنت اوناكي، دونيادا قويموش بو قراري
سايسير «زر» اولار، چوخلودا «زور» بوللودا «تزوير»
اوندا بشرين بخت اولار عالم‌ده شكاري
«آرش»‌ده دوروب، بانلاسا، تئز خيخلا، سسين‌ كس
قينقيت گئده، آلچاق‌دير اونون چون‌كي ديواري

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

ایشیق درگیسی، سایی 1
ایشیق درگیسی، سایی 2
ایشیق درگیسی، سایی 3
ایشیق درگیسی، سایی 4