دونیا هر گون
اؤزونون کیچیک بیر پارچاسینی
آخشامین جیبلرینده اونودور
و کیمسه بونون فرقینده دئییل
اوخونمامیش مکتوبلارا تای
یارپاقلارینی سونباهار یئلینه تاپشیران آغاجدان سووای.
سن بو سسسیزلیگین هانسی بوجاغیندان گلیرسن؟
سن گلیب چاتمادان
هاوانین آغیرلیغی دهییشیلیر
سانکی اوکسیژئن ده
آدینی ازبر.
سنین یانیندا
زامان اؤلچوسو
داها ساعات دئییل
هانسی دنیزه آخماغینی بیر آنلیق اونوتموش
دره اوزونو آوارا قالمیش بیر چای.
اَلیمی بیر داشین اوزهرینه قویورام
ایللر بویو کیمسه سسینی ائشیتمهمیش بیر داشین
آنجاق بوز آلمیش جانینین آلتیندا
سیسقا بیر ایشیق نفس آلماقدا
سانکی تانری
هله ده یارانیشی تاماملاغا چالیشیر.
سئوگی
چاتماغا بنزر دئییل
بیر گون گؤزونو آچیب
بیردن-بیره اؤزونو کائنات جاذبهسینین مرکزی گؤرمکدیر
سن دبرمیرسن
و بوتون دونیا سنه دوغرو چکیلیر.
و سن گؤرورسن
یاشامین اوتاییندا
هئچ بیر سینیر یوخ
او گوندن بویانا
هر گؤزونو یومدوغوندا
دونیا یونگوللشیر
سانکی ایشیق یارانمامیشدان
اینسان اورهییندن کئچمیش.
