هر شئی دوزه‌لر
روزبه صمدی نیراوغلو

آی داداش غم یئمه هر شئی دوزه‌لر
سؤکولر أیری بنا پئی دوزه‌لر
مئیه گیزلین سو قاتیر وارتانیمیز
کؤهنه میخانه گولر مئی دوزه‌لر
قورتولوبدور داخی گؤز یاشلاریمیز
آغلایان اولسا اگر، نئی دوزه‌لر
قارتالین بئینیه داش زیخلادیلار
قارقالاردان، گؤره سن لئی دوزه‌لر؟
گونلری گونلره قوربان دئدیلر
دئدیلر آذر اؤلر دی دوزه‌لر
تهرانین باغرینا غم چؤکدو یامان
تهران افسرده اولوب، ری دوزه‌لر؟
بیزی بیزدن آییرانلار بیز اولوب
قددیمیز هئی أییلر، هئی دوزه‌لر
تئی بیزیم دوزلریمیز أیری چیخیر
ظالیمین أیریسی ده تئی دوزلر
قاش دوزلدنلریمیز گؤز چیخادیر
عیبی یوخ سینسا الیف، بئی دوزه‌لر
قول قیچیم سانجییا دوشموش کئیی‌ییر
اولسا تندیر دئدیلر کئی دوزه‌لر
قدیم آرواد مه‌یه وار اود قالایا
داها فیکر ائیلمه کئی مئی دوزه‌لر
ماشین عصرینده باتیب هر نه‌ییمیز
هارداسان ساده‌لیگیم ا….ی؟ دوزه‌لر
عؤمروموز دیدی داشا چیخدی باشا
ائل دئییر سن ده کفن گئی دوزه‌لر
آی «نیراوغلو»نه دئییرسن گئنه سن؟
ائل مگر ائیلسه آخ وئی، دوزه‌لر؟
بونو یاز رمکه‌یه سال وور دووارا
آی داداش غم یئمه هر شئی دوزه‌لر
۲۲/ آبان/ ۹۸