قوللوقچو
افروز خانیم

گئجه‌نین بیر یاریسی چیراغلاری سؤندوروب پرده‌لری چکمیشدیک. هره اؤز موبایلی‌لا یورغان دؤشکده اوزاندیغی حالدا مشغولودو. ایکی بالامیز ائوین اوست قاتیندا. منیله یاشام یولداشیم ائوین آلت قاتیندا. بو هر گئجه کی ماراقلی برنامه‌میز ایدی. چئشیدلی قونولارا باخیردیق. هردن ده گولومسه‌یرک بیر زاد بیربیریمیزه گؤرسه‌دیب،بیربیریمیزین مجازی سئوینجیمیزه شریک اولوردوق. بو حئینده لاپبادان یاتاق اوتاغیمیزین گوروپپپ. . . قاپیسی آچیلدی. دیک آتیلیب یئرین ایچینده اوتوردوم. موبایلین ایشیغین توتدوم قاپییا ساری. بیرده گوردوم قاینانام.
– آی ننه بئله باشینا دولانیم، به سن حریم خصوصی زاد بیلمزسن؟! آخی بورا بیزیم یاتاق اوتاقیمیزدیر!! بئله لاپبادان گلیرسن اوره‌ییمیزین بندی قیریلدی هله هئچ، خودای ناکرده ناجور بیر دوروم دا دا گؤرسه‌یدین بیزی، دییه جکدین ایندیکی‌لرین حایا آبیری قالیب دده‌سی ائوینده. باشینا دؤنوم بو نه سایاق گلمکدیر آخی؟!
توووشون درمه‌یه لاپپادان دوشدو تختین اوستونه.
– گلین او داریسقال کومه‌مدن باخیردیم سیزین ائوه. اؤزون ننه اولوب گؤروبسن ننه قوربان. اوشاق نه یاشا گله‌هاا ائله ننه‌سینه اوشاقدیر. گؤردوم چیراقلارینیز یانمیر. آلت اوست ائوده (قوللوقچو) یاندیریبسیز. دئدیم ایلاهی نه اولوب گؤره‌سن؟! بالام برق پولو تاپماییب؟! یوخسا قوللوقچو یاندیرماق مُد اولوب؟! من کی سیزی برقلی قویوب گئتمیشدیم؟!
گولمک توتدو اؤزومو. باشیمین اوستونده کی پریزی ووردوم چیراق یاندی.
– – همشه نیگران باشینا دؤنوم آناجان. ائله دئییل. دوغرو کی باهالیقدیر، امما شوکور او گونه ده قالمامیشیق؛ هله برقیمیزین پولونو تؤکه بیلمییک. برق وار. اوزوم آیاقین آلتدا، یاتمیشدیق مثلن. بودا (قوللوقچو) دئییل ننه‌م جانی. موبایل دیر.
– نمنه؟! ماوایل نه دیر آی بالا؟!
– موبایل بیر جوره تئلفوندیر. هر یئره اؤزونله آپارماق اولار‌. بیرده تکی دانیشماق اوچون دئییل. اونلا چوخلو چئشیدلی ایشلر گؤرمک اولار. مثلن دوستلارینلا یازیشا بیلرسن، شکیل چکه بیلرسن، کیتاب اوخویا بیلرسن، سئودیگین قونولاری دوستلارینلا اورتاق اولا بیلرسن. و. . . . و. . . . چوخلو باشقا ایش‌لر. الان من ادبیات سئونلر قوروپوموزدا دوستلاریملا دانیشیردیم سن گلدین(الیندن میرریخا قاچمیشام هردن بیر یئر اوزونه اوغورلوق گلیرم. جین کیمی‌اییی چکیر بیلیر)
– ننه قوربان. اوندا غریبه بیرزاد دیر بو ماوایل. من کی کورام، یازی پوزو بیلمیرم. منه کارا گلن بیر شئیلر گؤستر.
اینستاگراما کئچدیم. آنا بو چوهرایی کی گؤرورسن بونا دئییرلر اینستاگرام. بوندا یازیدا یازماق اولار، امما چونکو سنین ساوادین یوخدو، اؤزوندن، منظره‌لردن شکیل چکیب قویا بیلرسن دوستلارین باخا.
– هه بالا(اوستا قولام) یاخشی معماریدی. قایناتاندان قاباق منیم ائلچیمیدی. هئییی قیسمت. آللاه باغیشلاسین(البته شهرین یاریسیندان چوخو منیم بو قاینانامین ائلچیسی ایمیش). یاخشی کی من الان قایناناتان تزه آلان زر پولکلی تومان کوینَگیمی، پوللو-موللو جیلیتقامی‌گئیمیشم. قدیم شَکی کلایاغیمی‌دا باغلامیشام. ایندی من دن جوربه جور شکیل چک، قوی او کور خججه‌نین، خبیث اوربابانین، چئروان گوللی بگیمین، قارداشیم آروادلارینین،بالدیزلاریمین باغری چاتلاسین.
دوغروداندا آرواد تزه پالتاریندا یار- یاراشیقلی ایدی. دوشمان توخماغی اولموشدو لاپ. اؤزوم ده قصدیجه جوربه جور ژست توتماق اویرتدیم. سونرا گالری ده شکیل‌لرین گوستردیم نئجه فخر ائلیردی اوزونه. دئدیم:
– آناجان، آمما سنین اینستاگرامین یوخدو کی بونلاری‌هایاندا پایلاشاجاقسان؟!
– اوزون بیر چا ره ائله دای گلین.
– آهان صاباح سنه بیر صفحه آچاجاغام آدیندا قویاجاغام. . . . . قویاجاغام. . . . تاپدیم. آدین قویاجاغام کوئین‌بیی. یانی ملکه آری. لاپ بئله لاکچری.
– لاخ چِری نه دیر ننه قوربان؟
– لاکچری یانی با کلاس. یانی. . . یانی مُدللی.
– هه اولدو ننه قوربان. گوروم نئینرسن.
بو حئینده گوردوم بیری منی سیلکه‌له‌ییر.
– افروز. . . افروز. . ‌. قیز نه واختیدی نه سؤیله‌نیرسن یوخودا؟! اویان اوستونوده اؤرت. صاباح دییه‌جکسن بئل بوخونوم آغریییر. بهانه ائله‌ییب ناهاردا بیشیرمییه‌جکسن.
حیات یولداشیمیدی اویادیردی منی. آییلدیم گؤردوم یوخو توتوب گوشی بؤیرومه دوشوب. ائله تلگرامدا ادبیات سئونلر قوروپوندا قالیب. شارژی قیزاریب بئش اولوب. هووله‌سک گوشینی شارژا ووردوم. لاپدان اؤزومه گلدیم. قاینانام ایللریدی اولموشدو رحمتلیک. اوندا هله اندروید گوشی زاد یوخویدو. تانری سنه رحمت ائله‌سین آرواد. یئنه یوخوما گلیب منه بیر طنز سوژه‌سی چیخارتدین. یوخولو بیر فاتحه اوخودوم. گئت سئونلرینین یوخوسونا گیر دئدیم. ایندی هر زامان قارانلیقدا گوشیلریمیزی یاندیراندا دئییرم: قوللوقچولار یئنه یاندی. هئچ کیمسه بیلمه‌ییر بو آدی قینانام موبایلا وئریب.