نه کیتاب بازلیغی‌دی؟
بیوک‌آغا افندی

فیکیر ائله‌مه‌یین اؤزومو اؤیورم؛ اصلن خوشوم گلمز اؤزومدن دانیشام. مندن گرگ دونیا دانیشسین. دونیانین ائوی ییخیلسین، باشین ترامپ‌لا، نجفی‌یله قاتیب. فیکیری قالیب گمی، نفت، دلار یانیندا .
منم‌لیک اولماسین؛ من یازان شعری هله -هله یازان اولماز .من آذربایجان شعرینین بوتون ژانرلاریندا شعیر یازمیشام؛ ایستر کلاسیکا اولسون -عروض یا خود هجا وزنیند-؛ ایسترسه سربست، پست مدرن، فول پست، فرا پست مدرن؛ منه سو ایچیم کیمی‌دیر .
حقیقتن بو گون چوخ شاعیرلرین شعرین اوخویاندا آدامی‌آغلاماق توتور. قارداش! هیچ اولماسا گل منیم بو یئتیم قالمیش کیتابلاریمدان نئچه‌سینی اوخو، اؤیرن دا! قارداش، باجی! قیرخ بئش ایل بوندان قاباق تیر آیی‌نین اوتوزونجو گونو گئجه ساعات ایکینی اون دؤرد دیقه، اون دؤرد ثانیه کئچنده، دیب اوتاقدا قیرمیزی فرشین اوستونده بونو یازمیشام :
گئتدیم گؤردوم باغدا آدام
سیندیریب یئییردی بادام
ایندی، سن اوغلان تاپ بادامین دؤر-برینه دولانسین و یا آذربایجان سربستینده تایی اولمایان بیر شعری بیلدیریرم: بایرامدان اون بئش گون کئچنده هله آغاجلار گول آچمامیشدی، گئجه یوخودا گوردوم منی بتر قووورلار. هراسان آییلدیم. فوری ال به ال بو سربستی یازدیم:
آیاقلاریم چیینیمده
باشیمی‌قووالاییرام
بو سرحدن اوسرحده …
سیز الله، ایندییهجک بونون تایین کیمسه‌دن ائشیدیبسینیزمی؟ من اؤلوم اوتانمایین‌ها!
چوخلاری منه دئییر: سنین او پست مدرن شعرین یاماندی، قیامتدی. سیز اؤله‌سینیز، بونو ایکی ثانیه‌ده یازمیشام:
قاینجیمین اوجو داریخیررررر
قافقازدا میل دورورام‌
دونیانین گیلیف‌لریندن تیرن کئچرمی؟
ساعات ۱۵ده باشیمی‌کسدیلر
قارقالار گیردکان اوینایاندا .
بیر نفر فرانسه‌دن منه یازمیشدی: قارقالارین گیردکان اویناماسی بتر یئرینه دوشوب. بلکه ده بو فرا‌پست‌مدرن‌دیر ؟ دئدیم: یوخ قارداش، بو تامامی‌له پست‌دور! منیم فراپست‌مدرن‌لریمی‌هله امریکالی‌لاردا یازانماییب .اونا بیر نمونه اوخودوم اوچ گون آغزی آچیق قالدی:
کوچه‌میزین اوتوز ایکی دیشی وار
ماشینلار دیلیمین اوجوندان سویروشور
سرابدا حالوا چالیرلار
گؤزلرین دونیانین ائوین ییخیر
شالوارینی چک
آماندی
یالقیزلیغیمی‌داشییان کروان
تورموزون قیردی .
قزئت‌لردن لاپ زحلم گئدیر. هر گون اونون- بونون دالینجا مین سؤز یازیرلار، آغای دؤکتور، فلانکسین ساوادی ائله‌دی، بئله‌دی .بابا، شعر آللاه وئرگیسی‌دیر. کیتاب اوخوماقلا کیمسه شاعیر اولماز .بو قیبله‌یه آند اولسون، من هئچ بو گون قدر ایکی دنه‌ده کیتاب اوخومامیشام. شاعیر اولسان، کیتاب اوخوماق لازیم دئییل کی؛ شعر سنه یا یوخودا ایلهام اولار، یا دا اویان- بویاندان گؤتوررسن. نه کیتاب بازلیغی‌دیر؟!