کیشی‌سن، آنجاق‌کی…!؟
حمید آرش آزاد
(آتا گونو مناسبتینه)

اوْلسا یوکسک مقامین، چوْخلودا ثروت، کیشی‌سن
قسمت اوْلسا سنه عالم‌ده سعادت، کیشی‌سن
آنا سؤیلر کی: «اگر آروادی مجبور ائده‌سن
ائله‌یه عؤمرو بوْیو من‌دن اطاعت، کیشی‌سن»
باجی‌نین فکری بودور کی، سن ائوینده قادینی
قوْیاسان ایل‌لر ایله خوْش گونه حسرت، کیشی‌سن
قادینین‌دا نظرینده، آنانی، هم باجی‌نی
ائتمه‌سن ائوده قوْناقلیق‌لارا دعوت، کیشی‌سن
اوْ دئیه‌ر: «آغزینا چال هم آنانین، هم باجی‌نین
بولار ائتمه‌زسه بیزیم ایش‌ده دخالت، کیشی‌سن»
باجاناق بیر آرابا گؤردو، تئز ایستر سیویچی
«پئژو» نو وئرسن اوْنا هرگون امانت، کیشی‌سن
قارداشین ایستیری تئز- تئز اوْنا ضامن اوْلاسان
ائله‌سن بوْرجلو دوشن گون‌ده ضمانت، کیشی‌سن
قایین، عسکرلیگی وئرمیش باشا، ایش‌سیز دوْلانیر
سرمایا وئرسن، اوْدا ائتسه تجارت، کیشی‌سن
قوْنشونون اوْغلو، سنین اوْغلونو هئی تاپدالاییر
دینمه‌ییب، گؤستره‌سن بوْللو نجابت، کیشی‌سن
تعظیم ایستیر رئیسین گون‌ده اوْتوز- قیرخ دفعه
گون‌ده یوز یوْل ائده‌سن عرضِ ارادت، کیشی‌سن
قصابین- باققالین البته توقع‌لری وار
سوْرماسان‌کی: «نییه‌بس قالخیری قیمت؟» کیشی‌سن
دوْستلارین لُطفو سنه چوْخ‌دور، ارادت‌لری وار
شام- ناهاردا وئره‌سن یاغلی ضیافت، کیشی‌سن
ایل‌ده بیر سئچگی اوْلور، مین‌لر آدام کاندیدا
هامی‌سیندان ائله‌سن دوزگون حمایت، کیشی‌سن
کیم «سلام» سؤیله‌دی، وار حقّی سنین بوْینوندا
قوربان ائتسن اوْنا جان‌لا مالی راحت، کیشی‌سن
کیشی گؤردوم سنی «آرش»! جانینا آند ایچیره‌م
سن اؤل‌ها…، چون‌کی وارین بوْللو حماقت، کیشی‌سن