بایرام قاباغی بیزیم ائوده
افروز خانیم

بایرام قاباغی بیزیم ائوده ال قویساق بیر آز تعمیراتا، ایشیمیز هر طرفدن أییلر. یانی ایسته‌ریک قاشین دوزلدک، وورار گؤزوده کور اولار. گ‍ؤزون جورلاساق، بورنو أییلر؛ بورنون جورلاساق آغزی. خیلاصه یئردن گؤیدن بیزه بلا یاغار. سانکی زیرکلیگ بیزه توشمه‌ییر. اینانمیرسیز قولاق آسین:
اسفندین آغیر و قارا گلمیش قارلی گونلرینین بیری عائیله‌لیک (۱+۵)دن مهم بیر نشست قورموشوق و بایرام قاباغی ائوه نه ائده‌جه‌ییمیزی دانیشیریق. بیزیم ائوده چیلخا دموکراسی‌دیر. یانی ممه یئیه‌ندن پپه یئیه‌نه‌هامی‌نظر وئرر. حتا وتو ائله‌سک‌ده بیرگه وتو ائله‌ریک. قویدوغوموز قرار ائله محو اولار، سانکی یوخویموش ازلدن.
نه ائده‌جکلریمی‌بیر بیر اولویتله تنظیم ائدیریک. اول کابینت‌لر یئره أندی، تزه‌لندی. اوندان ائو رنگله‌مک قرارینا گلدیک؛ ووردی نودانیمیز دوندو؛ آغا سو وئردی بوتون‌هالین دووارلارینا. بیر شیکیل آدام گتیردیک نودانی آشدیردیق؛ سوبانی خودلاماقلا دوواری قوروتدیق. گازدادا کامیلن اسراف ائله‌دیک. ائوی ده رنگلتدیک. نقاش بو دؤنه دئدی:
– افروز خانیم، ائوین گؤزللیگی آستانادان معلوم اولار؛ او سالن بو‌هالا یاراشمیر.
سالون دا رنگلندی.
– افروز خانیم باخین بو راه پیلله نرده‌لری سانکی یاماق گؤروکور بو رنگلنمیش سالونا.
نرده ده رنگلندی.
اوشاقلار: – آناجان بو پرده‌لر داها ائوه یاراشمیر.
پرده ده دئییشیلدی.
آغا: – خانیم فرشلریمیزده تای دئییشیک دی؛ پیلله فرشلرده یئییلیب.
اوشاقلار: – مبلوموزدا موددان توشوب.
– قاپیلار دا گرک رنگله‌نه. لوسترده کی کؤهنه‌لیب.و..‌و…و…
آغا یئر گؤی بیزیم علیهیمیزه قالخدی.
لوله توتولدی، داشدی؛ شیر آتدی؛ بیری آچیلیب باغلانمادی؛ قاپی جیریلدادی؛ تئلویزیون گورولده‌دی؛ لامپ آتدی؛ سیم یاندی؛ شیر دوندو؛ آبگرمکن خراب اولدو. خیلاصه ایش قالمادی بیزیم بلالی باشیمیزا گلمه‌سین. سانکی بیزیم ائوده کی میدان مغناطیسی قاپی قونشونوندا نه بلاسی وار چکیردی بیزه ساری. اوکو وار بورجا- خرجه توشدوک. ایندی الی یالین گئدیریک بایرام استقبالینا. هر دردیمیزدن ده چتین بو ترامپ کؤپک اوغلو آمئریکا ممالیکینین یولون ایرانلیلارا باغلاماسیدی. ائله باخ بو اویونلار باشیمیزا گلمه‌سیدی‌هااا؛ بو ایل بیر دیل گئده‌جکدیک واشنگتونون اورتا گؤبگینه. یانی بیزیم اوشاقلار جیبیمیزین بتر پوللو اولدوغونا گؤره اوندان آشاغییا راضیلاشمازلار. صاباح دئمه‌یین افروز قییمادی بایرام سفرینه گئده. ترامپ بئی قویمادی. آداما اوخشاماز ساری سوسار کؤپک‌اوغلو. یوخسا چمدانلاریمیزاجا باغلامیشدیم اؤز جانیم ایچون.