ناغیل شیرینلیگی، چؤره‌ک عطری
محمدرضا احمدی(آراز)

کندیمیزده گؤز آچدیم دونیایا؛ دیل آچدیم دانیشدیم و آنامین لای _ لای‌لاریندان موسیقی اؤیره‌نیب، نغمه‌لر اوخودوم. گونلرین بیر گونونده تندیریمیزین تؤکولوب داغیلان بیر چاغیندا، آنام دئدی:
– آی منیم نازلی بالام، آرتیق داها تندیریمیز تؤکولوب، داغیلیبدیر. گل گئده‌ک تندیر تورپاغی گتیره‌ک و یئنی‌دن بیر تندیر قویاق!
دئدیم :
– آی آناجان، تندیر تورپاغی نه‌دیر؟
آنام دئدی:
– گول بالام، بیر قیرمیزی تورپاغدیر. یاخشی بیر پالچیغی اولار و اوندان گؤزه‌ل تندیر قوروب، قویماق اولار. بونون اوچون ده بو تورپاغا تندیر تورپاغی دئییریک.
اوزون سؤزون قیساسی؛ یولا دوشدوک. کندین شمال تاییندا بیر تپه وارییدی. تپه‌یه دوغرو یوللاندیق؛ یئتیشدیک مقصده. تپه‌نین چوخلو یئرلری قازیق _ قازیق ایدی، من سوروشدوم:
– آناجان ! بو تپه نه‌دن بؤیله قازیلیبدیر؟
آنام سؤیله‌دی:
– دوزلو بالام، بو تپه‌نین تورپاغی چوخ یاخشی قیرمیزی تورپاق اولدوغو اوچون کندین‌هامیسی بوردان تورپاق آپاریرلار.
آنام‌لا بیرلیکده یئری قازیب، بیر اوزون قولاق ایله بیر قاتیر یوکی قده‌ر تورپاق گؤتوروب، ائوه قاییتدیق! باشلادیق پالچیق توتماغا و پالچیغی بوللو آیاقلاماغا. بیرگون پالچیق یئتیشدیکدن سونرا آنام باشلادی تندیری قویماغا. نهایت تندیریمیز دوزه‌لیب، بیتدی. سونرا آنام تندیرده اود یاندیریب، اونون پالچیغینی تام پیشیریب، ساخسی‌دک برکیتدی. بیر نئچه گون کئچدی. آنام خمیر دوزلدیب، یئنی قورولموش تندیریمیزده چؤره‌ک یاپدی.
آنام یئددی نؤوع چؤره‌ک پیشیرمه‌نی چوخ یاخشی باشاریردی: «ساج لاواشی»، «تندیر لاواشی» و بئش نؤوع قالین چؤره‌ک: «یالین قالین» (خمیرایله پیشیریلن قالین چؤره‌ک)، «یاغلی فتیر» (ساری یاغ ایله مایالانمیش خمیردن پیشیریلن قالین چؤره‌ک) «سوت فتیری» (سوت ایله مایالانمیش خمیردن پیشیریلن قالین چؤره‌ک)، «قاتیق فتیری» (اوزونه قاتیق یاخیلمیش خمیردن پیشیریلن چؤره‌ک. بو فتیر‌هامیسیندان آرتیق قیزاراردی)، «ته‌ته» (یاز چاغیندا داغ تره‌سی، او جومله‌دن: یاغلیجا، قاز آیاغی، ماندا، سیغیردیلی و باشقا دادلی _ یئملی بیتگی‌لردن قاتیلمیش خمیردن پیشیریلن قالین چؤره‌ک. آنام بو بیتگی‌لری داغدان توپلایاردی.) بو چؤره‌ک نؤوع‌لری کندیمیزین ده‌ییرمانیندا دارتیلان کپک‌لی اون‌دان حاضیرلاندیغی و تندیر یاناجاقلاری آغاج و تزه‌ک (مال- داوار فضولاتی) اولدوغو اوچون چوخ دادلی اولاردی.
آنامین تندیرینده چوخلو شیرین آن‌لاریم اولوبدور. یاز ایله یای دا مکه، ات کابابی، یئرآلما کابابی پیشیرردیک؛ پاییز و قیش‌دا ایسه چؤره‌ک یاپاندان سونرا‌هامیمیز بیرلیکده آیاقلاریمیزی تندیره ساللاییب، آنام ایسه بیزه ناغیل دئیردی! ناغیل شیرینلیگی چؤره‌ک عطرینه قاریشاردی. او گونلر بیرده قاییتسایدی… کاش!!!