گونئی آذربایجان ادبیاتی آنتولوگیاسی (چاغداش دؤور) یاییلدی
الیمیزه چاتان خبر اساسیندا، پروانه خانیم ممدلی‌نین تشبوثو ایله حاضیرلانان “گونئی آذربایجان ادبیاتی آنتولوگیاسی” کیتابی باکی شهرینده ایشیق اوزو گؤردو. کیتابا گونئی آذربایجاندا یازیب یارادان ۹۴ شاعیر و یازیچی‌نین قیسا بیوگرافیاسی و اثرلریندن نومونه‌لر داخیلدیر.
پروانه خانیم ممدلی کیتابین حاضیرلاما پروسسینی آیدینلاشدیرماق مقصدیله بئله بیر ایضاح یازمیشدیر:
الئکترون پوچت و سوسیال شبکه واسیطه‌سیله یازارلارا موراجیعتلر ائتدیم. جاواب وئرنلر چوخ اولدو. آما سس-سوراقلاری گلمه‌ینلر ده اولدو. قیراقدا قالماسینلار دئیه اونلار حاقدا بیلگینی حیصه -حیصه (ذره-ذره) توپلامالی اولدوم. بعضیلری‌نین سوراغی آرتیق کیتاب چاپا گئده‌ن عرفه‌ده چیخدی. کیتاب اوزه‌رینده بیر نئچه ایل ایشله‌دیم، ایکی ایل ده چاپی گؤزله‌نیلدی. بیر ده ائله یازارلار اولوب کی، گوجلو قلم صاحیبی اولسالاردا، بیر نؤع گوشه‌نشین اولوب، اثرلرینی یایمامیشدیلار و آدلاری کیتابا دوشمه‌ییب.”
“گونئی آذربایجان ادبیاتی آنتولوگیاسی (چاغداش دؤور)” کیتابی “آوروپا- آذربایجان جمعیتی‌نین آراشدیرمالار مرکزی”نین یاردیمی‌ایله چاپ ائدیلیبدیر.
