دوزدور من اؤزوم تبریز اوشاغییام، آما بو تبریزلی همشهریلریمین بؤیوک بیر ایرادی وار کی بویونلارینا آلمازلارکی هئچ، آدامی بوشلو دا سالارلار! تبریزلیلر دیلچیلیک باخیمیندان آذربایجان تورکجه‌سینین بیر چوخ یاساسین پوزوب، تبریزه قوناق گلنلرین ده دئییمین ائله به‌ینمزلر! اؤرنک ایچین تورکجه‌میزده بیر سؤزون سسلیلری قالین اولسا، او سؤزه اکله‌نن سسلیلر ده قالین اولمالیدیر، اینجه اولسا اینجه!
«بیل»سؤزونده”ی”سسلیسی اینجه سس اولدوغونا گؤره، کسین گله‌جک چاغیندا(زمان آینده قطعی) صرف ائدیلنده اکلر(شکیلچیلر)ده اینجه سسلی اولوب، بئلنچی صرف اولونار: «بیله‌جه‌یم/بیله‌جکسن/بیله‌جکدیر/بیله‌جه‌ییک/بیله‌جکسینیز/بیله‌جکدیرلر» آما تبریزلیلرین دئییمینده بئلنچی صرف اولونار: «بیله‌جاام/بیله‌جاخسان/بیله جاخ/بیله‌جااخ/بیله جاخسیز/بیله‌جاخدیلار»!
مثلن “هارا آلیرسان؟”ی مخفف ائدیب دئیرلر:«هارالیسان؟» اونا گؤره آدام بعضن یانیلیب، طرفین منظورون یاخشی باشا دوشمز!
تبریزین بو دئییمی بیر گون منیم خئیریمه اولدو، آما خاطیره‌سی گولمه‌لیدیر. ایللر اؤنجه سوروجولوک تصدیغین(گواهینامه رانندگی)آلماق ایندیکی کیمی راحات دئییلدی، علائیم سیناغی هفته‌ده بیر گون اولاردی اونو دا گرک آد یازدیرایدین نوبه سنه چاتسین، علائیمدن چیخا بیلسه یدین، نوبه ده قالماق وار ایدی، گئجه ایله صفده یئر ساخلاماق وار ایدی، اونو دا ایلده اوچ _ دؤرد دفعه شهری سیناغا یول تاپا بیلردین! مثلن اوباشدان چاغیندان آج _ سوسوز نوبته دایانیبسان، افسرین یانیندا آینانی تنظیم ائتمه‌یی اونوتسایدین، افسر دئیه‌جک ایدی:« هله ماشین سورمه یی باشارمیرسان، رد اولدون، دوش آشاغی!» آما ایندی افسرین یانیندا ماشینی یولدان چیخاردیب یئتدی دفعه مایاللاق دا ووردورسان، قبول اولا بیلرسن!!!!
من ده اون _ اون بئش دفعه علائیمده رد اولاندان سونرا، بیر گون شانسی قبول اولوب‌‌ شهری سیناغینا یول تاپدیم!  گئجه _ گوندوز ماشین سوروب تمرین ائده _ ائده سیناق گونو افسرین یانیندا بارا وئریب‌‌ رد اولوردوم! بیر گون افسره سلام وئرمه‌مه‌یه گؤره،‌‌ بیر گون دنده‌ ده‌ییشیلمه‌مه‌یه گؤره‌‌، بیر گون کیلاجی تئز اؤتورورب ماشینین سونجوق آتماغیما گؤره، بیر گون قاپینی اؤرتمه‌یی یادیمدان چیخارتماغا گؤره و … رد اولوردوم!  آرتیق افسرلرین‌ده هامیسی منی تانیمیشدی! هر شهری سیناقدان قاییداندا،رنگیمین آتماغیندان هامی بیلردی قبول اولمامیشام، اونا گؤره کیمسه او گون من ایله باش _ باشا وئرمزدی.
بیر گون یئنه شهری سیناغا آد یازدیریب “شهرک آزمایش”ه گئتدیم. من سوره‌جه ییم ماشینین افسرین ایندیه کیمی گؤرمه‌میشدیم‌‌. ائله فرمان دالیندا اوتورماق هامان، مندن سوروشدو:«اوغلوم!نئچه‌مینجی سئریندی ایمتاحان وئریسن؟»
_جناب سروان!بئش ایلدی بورا یول دؤیورم‌‌ یادیمنان چیخیب نئچه سئری رد اولموشام!
افسر گولومسه‌ییب منه یازیغی گلمیش کیمی اوزومه باخدی! سیرا منده ایدی!  نم نه عجب بو سئری یاخشی باشلامیشدیم، یاواش-یاواش قبول اولماغیما اینانمیشدیم کی افسر دئدی:«ههههه!ایندی اولدو باااااا‌‌ ائله بوردا ساخلا، پارک ائله! ایه پارکی دا دوز گئتسن قبولسان!» سئوینه-سئوینه همشه ایتیردیییم دالی دنده‌نی تاپیب‌‌ پارک ائتمه‌یه باشلادیم! نئچه ثانیه سونرا قبول اولدوغوم آنی دوشونوردوم کی ماشینین دالیسیندان تاققیلتی سسی گلیب‌‌ بیردن بیره جناب سروان باشیما چیغیردی:«اوغلان!هارالیسان؟»
بیر آن جناب سروان ایله بیر محله اوشاغی اولدوغوموزو یوخسا اوزاق فامئل اولدوغوموزو دوشونوب دئدیم:«جناب سروان! من ائله تبریز اوشاغییام باااااااا!  بوردا طالقانی ده اوتورروخ باااااا!  شاید آغاجانیمی تانییا بیلرسن بااااااا‌‌ ج ج ج ناب س س س سروان!  من مش حیدرین اوغلویام بااااااا!  باغیشلاهااااااااا جناب سروان!  سن اؤزون هارالیسان؟»
جناب سروان حیرصله نیب دئدی:«اوغلان! “هارالیسان؟”دان منظوروم بودوکی من سنه دئییرم ماشینین فرمانین هارا آلیسان‌‌ دئمیرم کی هاردا اوتورورسان‌‌، کیمین اوغلوسان؟ هر واخت فرمان دالیندا اوتوردون بیری سندن سوروشساکی “هارالیسان؟” منظورو بودوکی فرمانی هانسی سمته آلیسان؟»
ماشیندان ائنیب گؤردوم ماشینی دالدالی سوروب پارک ائدرکن‌‌ ماشینی قنویا سالمیشام‌‌. دالدان گلن تاققیلتی سسی ده اونون سسی‌ایمیش! آرتیق بیلیردیم کی یئنه ده رد اولموشام.‌‌ معصوم-معصوم باشیمی آشاغی سالمیشدیم . جناب سروان یاخینلاشیب دئدی:«اوغلوم!بئله قاباغا گئتسن گواهینامه حسرتینده قالاجاخسان! آمما من سنی قبول حساب ائله‌دیم. سن ده دای قول وئرکی ماشین سورنده هوشون باشیندا اولسون! »
سئویندیییمدن بیلمیردیم نه ائدم؟ من ایله یاشیت اولانلار خلبان اولموشدولار‌‌، من هله ماشین سورمکده قالمیشدیم!  پئشمان اولماسین دئیه‌‌ جناب سروانین‌ اوزوندن اؤپوب‌‌ آرادان چیخدیم! ایندی نئچه ایلدیر کی دئمک اولار او جناب سروانین لوطفو ایله تصدیغیم وار‌‌. هر آخشام ایشدن چیخاندان سونرا ۴۷ پیکانیم ایله تبریزین خیاوانلارینین جانینا دوشوب‌‌ تاکسیلارا گؤز وئریب ایشیق وئرمرم!  آللاه برکت وئرسین‌‌ هر آخشام اوستو بئش-اون مین تومن ده موسافیرلردن قازانارام!
بیر گون آخشام اوستو اوتوبان ایله گلیردیم کی بیر نفر موسافیره اوخشادیب چیراغ وئردیم‌‌ او دا «دربست! » دئدی. طرفین سسی چوخ تانیش ایدی.‌‌ بیر آز فیکیرله‌شندن سونرا گؤردوم‌‌ پاح آتانان!  موسافیریم هامان او منی قبول ائدن یاخشی افسردیر!
_ یاللاه جناب سروان!  بویورون اه‌یله‌شین.‌‌ هارا بویورسان یئتیریم!
_ قردش! “اورمو”یا گئده جااام!  نئچه آلاجاخسان؟
_ دوزدور ایندیه کیمی جاده یه چیخمامیشام، آما گل اوتور گئداخ! هئش نئچه ده آلمیاجاااام! منه قوناقسان!
_ اولماز آخی!
_ کیشی!  نئجه اولماز ؟ من سنین لوطفونله گونده بئش _ اون مین قازانیرام!  گرک بیر جور شرمنده‌لیییندن چیخام دااای!
جناب سروان قاپینی آچیب اه‌یلشدی. او جریانین اوستوندن نئچه ایل سوووشدوغونا گؤره‌‌ هر هاردان دئدیم منی تانیمادی!  آخیر جانا گلیب دئدیم: « جناب سروان!  یادیندا من ماشینی قنویا سالدیم‌‌ باشیما چیغیریب دئدین”هارالیسان؟” من ده محله میز ایله آتامین آدین سنه دئدیم‌‌ سن ده دئدین”فرمان دالیندا هر کیم سندن سوروشسا _ هارالیسان؟_ منظورو بودورکی ماشینی هانسی سمته آلیسان؟”»
_ هه …!  ایندی بیر قولای یادیما دوشدو بااااااا!  دوز دئییسن…! آمما دای ایندی یادیمنان چیخیبدی کی هارالیسان!  هله شوخلوخدان سوووشوب‌‌ ایندی دوغرودان دئ گؤروم هارالیسان؟
_ جناب سروان!  هئش زاد داااااا!  ائله بو اوتوبانی دوز گئده جااام‌‌ “تراختور” آغزینا یئتیشیب “خسروشاه”پلیس راهینا طرف‌‌ اوردان دا قدیمکی “اورمو گؤلو”نه طرف کی مسئوللارین لوطفو ایله “اورمو چؤلو”اولوب‌‌ کؤرپونو ده کی سوووشدوخ دای “اورمو”یا چاتمیشیق دااااااااااای!  او یاخجی اولماز ؟ تئز ده یئتیشه‌ریک!
_ اونو بیلیرم قردش!  محله زی سوروشورام بااااااااا!  دئییرم هانسی محله اوشاغیسان؟
_جناب سروان!  محله‌مین‌ده آدین‌‌، دده‌مین‌ده آدین نئچه ایل بوندان قاباق شهرک آزمایشده دئمیشدیم داااااااااای!  اوندا قولاق آسمادین‌‌ ایندی بیر ده سوروشوساااان؟ یوخ جناب سروان!  ایندی نئچه ایلدیر هرکس مندن سوروشسا “هارالیسان؟”، فرمان دالیندا اولسام‌‌ گئتدیییم مسیری دئیرم‌‌، یئرده اولسام محله‌میزین آدین!  قردشیمسن منی کیریخدیرما هااااااااا‌‌ یئنه ده ماشینی بیر یئره چیرپارام!  ایجازه وئر سنی محله‌زه یئتیرندن سونرا ماشیندان ائنیب‌‌ دئیرم هارالییام! من فرمان دالیندا هئش کیمه دئمرم هارالییام‌‌، هانسی محله اوشاغییام!؟
“اورمو”یا چاتاندان سونرا آرابادان ائنیب جناب سروانا اؤزومو تانیتدیردیم:«جناب سروان!  یادیندا اولسا دئمیشدیم کی من طالقانی اوشاغییام، دده مین ده آدی مش حیدر دیر!  ایندی دئ گؤروم سن اؤزون هارالیسان؟»
جناب سروان نم نیه باشین توولاییب‌‌ هارالی اولدوغون دئمه‌ییب‌‌ گئتدی!!