به بو … به بو … به بو … / پیس اوشاق
چئویرن: ایشیق
ترجمه: ایشیق
ایشیق
00:00
00:00

بو خانیم طایفاسی یامان چوخ بیلمیش اولار هاااااااااا ! اؤلچو _ بیچی اونلارین الینده اولار سونرا دا جیغاللیق ائدرلر ! مثلن ائلچیلیکده یالاندان درس اوخوماغی زادی بهانه ائدرلر، سؤز دانیشیلاندان سونرا، کبین کسیلنده ده “بعلی” سؤزو دیللرینین اوجوندا اولار، آما بیر ایستکان چای گتیرمه‌یه آغیرسانان قیزلار، هئی گئدرلر گول گتیررلر، چیچک گتیررلر! ناوار _ ناوار گئندن باخان دئسین:«نه آغیر قیز ایدی! هله _ هله بعلی دئمزدی هااااااااااا، کادولارین گوجونه دئدی !» منیم بو سکینه دایقیزیم ایله ائولنمه‌ییمه ده نئچه روایت وار کی اؤزومده بیلمیرم هانسی دوزدور، آما سکینه دایقیزیمین اؤزوندن سوروشاندا دئییر :«من ایله ائولنمه‌یینه قیرخ گون بیزه یول دؤیدونوز !» نه بیلیم واللا ! منیم یادیما گلن سکینه دایقیزی اؤزو منه قاچدی یوخسا من درس اوخوردوم، ائولنمک واختیم دئییلدی کی !
آما دوزون آختارسانیز من سوبایلیق‌دا اونلارین ائوینه قوناق گئدنده منه ائله “بی بی اوغلو” دئیردی کی ائشیتجک، آز قالاردی قلبیم دایانسین ! دئمه زور ایله ده اولموش اولسایدی، ایستیرمیش منیم اوره‌ییمده یئر سالا! کبین کسیلننده ده آز قالیردی حاجی آغا سوروشمامیشدان “بعلی”دئسین کی من گول _ چیچک گتیرمه‌یی یادینا سالدیم، آما ائولنندن سونرا “بیبی اوغلو” اونوتولدو ! یاواش _ یاواش منی سسله‌ینده کیچیک آدیم ایله سسلیردی : « آغا ابیلفضضضضضضضضضض ! » اؤزو ده بو “ض” حرفین ائله اوزادیردی کی لاپ بئینیم جیزیلیردی ! یاواش _ یاواش “ض” حرفیندن فاکتور آلیب، منی آغا ابیلفضضض _آغا ابیلفضض _ آ ابیلفض _ آ فض _ ابیلی _ ابی سسله دی ! ایندی داها هامیسیندان فاکتور آلیب بیر دفعه لیک ” ا ا ” سسلیر!
سؤز واختینا چکر، نم نئچه ایل قاباق ائله بو زامانلاردایدی کی سکینه دایقیزی بؤیوکلرین ایجازه‌سی ایله “بععععععلی” دئمیشدی ! (البته او ایل بایرام آخشامی دا هاوا شاختایدی .)بو “بععلی”دن بیر _ ایکی هفته کئچندن سونرا، هاوا سویوق، منه ده سویوق ده‌ییب زوکام اولموشام، قایناناگیلده ده قوناغام ! (قاینانا دا آخی ایستکلی اولار)، یون یورغانی چکیب اوستومه، هئی یارپیزدان دمله‌ییب منه ایچیردیر کی بو سویوق ده یمه کوره‌کنی‌نین جانیندان چیخسین ! آما سویوق منیم سوموکلریمه کیمی یئریمیشدی، جانیمین زوققولتو سسین قونشولار ائشیتدیکجه، فیکر ائدیردیلر تاراققا پاتلادیریق ! من بو حالدا اؤلوم ایله ال به یاخایام، سکینه دایقیزیم دا ایکی آیاغین بیر دیک دابان قوندارا باشماغا گئیمیشدی کی بیرلیکده دولانماغا چیخیب بایرام آلیش _ وئریشی یاپاق ! چوخ یالوار _ یاخار ائدندن سونرا منی اسپورتی گئییندیریب هاوانین شاختاسیندا دولانماغا چیخدیق ! یئر بوزلوق، منیم ده باشماقلاریمین آلتی کئچلین باشیندان، کاسیبین اوره ییندن صافدیر، یئرده _ گؤیده دورمور ! من ده خانیم گیلین محله لرین تانیمیرام کی هارا هارادیر ! بیر آز یول یئری‌یندن سونرا بیر اوزو یوخاری، ائنلی کوچه‌یه چاتدیق ! محله نی تانیمادیغیما گؤره، فیکر ائدیردیم تبریز بازارینا بو کوچه دن یول وار ! باشماقلاریم زویه _ زویه کوچه نی اوزو یوخاری چیخیریق !
هههههههههه ! دئمه سکینه دایقیزیمین مدرسه‌سی بو کوچه ده ایمیش، خانیم ایستیرمیش همی بازارلیق ائده همی ده یولو بو کوچه‌دن سالمیش ایمیش کی منی همکیلاسلارینا نیشان وئریب پوز وئره ! دوز مدرسه‌لر داغیلان زامان بیز کوچه‌ده یدیک ! ایندی خانیمین همکیلاسلاری، قونشولارینین قیزلاری، مدرسه‌دن چیخیب، ائولرینه ساری گئدیرلر من ده ایفاده ایله آتدیم آتیرام کی اونلارین یانیندا زویوب ییخیلمایام. قیزلار بیزیم قاباغیمیزدان سوووشدوقجا بیری دئییر:«سکینه ! آللاه خوشبخت ائله‌سین !» بیری دئییر:«قوشا قارییاسیز !» بیری دئییر:«ساغ الین بیزیم باشیمیزا !!!!!!!!» بیری …
داها هامیسی یادیمدا دئییل آما چوخ سؤز دئدیلر ! خانیم دا هره سینه بیر جور جواب وئریر . منیم بو زوکاملیغیم بس دئییل، اوتاندیغیمدان آلنیمین تری آخیب، آغیز _ بورنومون سویونا قاتیشیب ! آنجاق یاواش _ یاواش، منیم بو حالیمدا، هاوانین بو سویوغوندا، اؤزو ده بو ساعاتدا بو کوچه‌یه نیه گلدیییمیزی آنلادیم! آرتیق سیملریم قاتیشمیشدی ! کوچه‌نین اوزو یوخاریلیغین مین بیر مصیبت ایله باشا چاتدیردیق ! یامان اوتانمیشدیم ؛ خانیمین بو ایشیندن انتقام آلمالی ایدیم! اؤز _ اؤزومه فیکیرلشیب میرتا سالیب الیمی سکینه دایقیزیمین الیندن اؤتوردوم. سکینه دایقیزیمین مات باخیشلاری اؤنونده، بیر _ ایکی آتدیم قاچیب، بیردن یئره اوتوروب، بوزلو کوچه نی اوزو آشاغی زویمه‌یه باشلادیم، « به…بو…به…بو…» دئیرکن کوچه‌نی ایسکی گئدیردیم ! بیر آن اؤنجه سکینه یه تبریک دئین قیزلار، «به…بو…» سسینه هویوخوب، منی او حالدا کوچه ده زویولدک گئتمه‌ییمی گؤردوکلرینه آغیزلاری آچیق قالمیشدی ! بیری دئییردی :«سکینه نین ده نیشانلیسی دلی چیخدی !» بیری دئییردی:«یازیق قیز ! آللاه کؤمه یی اولسون!»بیری دئییردی :«به بو اوغلان بئش ده‌یقه قاباق سالیم ایدی آخی! بیردن بونا نه اولدو؟» بیری دئییردی:«یازیق ! اؤزو ده جاواندیر ! آللاه ایکی شفانین بیرین وئرسین !» سرعتیمین چوخ اولدوغونا گؤره چوخ سؤزلری ده هله ائشیده بیلمه‌دیم، آما سکینه دایقیزیمدان یاخشی انتقام آلدیم !
کوچه نین آشاغیسینا یئتیشندن سونرا ترمز توتوب دایاندیم، باشیمی چئویریب کوچه نین باشینداکی نیشانلیما باخیب گؤردوم کی سکینه دایقیزی مجسمه کیمی دایانیب منه باخیر ! فیکر ائدیرم من کوچه نی زویولده ییب آشاغی یئندیکجه، اونون دا فیشاری یئنیرمیش !!!!!!!!!! ایندی هردن او کوچه‌دن سوووشاندا، سکینه دایقیزیمین مجسمه خاطیره سی یادیما دوشوب او کوچه نین باشیندا،اونون مجسمه‌سین قوردورماق بئینیمه وورار !
ایندینین ایندیسی ده، قیش گونلرینده خانیم ایله بیرلیکده اوزو آشاغی کوچه _ خیاوانا چیخساق، یازیق ائله برک _ برک قولومدان یاپیشارکی ! دئسم ده : «قولومو بوراخ بیزیم قول _ قولا گئتمک چاغیمیز دئییل ! » دئیر :« قورخورام یئنه ده الیمدن قاچیب، زویولدک گئدیب منی اوتاندیراسان !»

منبع: Pisushaq Pisushaq

اشتراک گذاری در print
چاپ
اوخوماق زامانی: 3 دقیقه
اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email

به بو … به بو … به بو … / پیس اوشاق

ایشیق
www.ishiq.net

آذربایجان ادبیات و اینجه‌صنعت سایتی