صولحه گلین ای اینسانلار!
حسین واحدى
(1)
آى اینسان اوغلو، نه ائدیرسن، نه‌یى دوشونورسن؟ نه‌یى کیمه وئرمک ایسته‌ییرسن؟ نه‌یى کیمدن آلیرسان؟ اؤزونه دؤن، اینسان اوغلو! اینسان یاشا! آدینى اینسان قویوبسان، باریشى ایسه فقط کاغیذ اوستونه یازیسان!
باخ:
بورا فلسطین‌دیر، گؤزل بیر اؤلکه، باریش ایسته‌ییر، اینسان اوغلو گؤرورسنمى؟
بورا ایسه قاراباغ‌دیر. جننتین بیر بوجاغى. یئنیدن چیچکلنمک ایسته‌ییر. اؤز وارلیغى آذربایجان لا، بیرگه یاشاماق ایسته‌ییر.
بورا میانمار، اینسانلار گوناه ائتمه‌دن یانار! باخیرسانمی؟
بورا آفریقا، آج یاتیر اوشاقلاری، سن قارنینی دولدورا بیلیرسنمی؟
بورا عیراق، اورا میصیر، ساغیمیزدا افغانیستان، سن هئچ قورخما، یئرینده دور، بیرآز دایان!
سولوموزدادیر لبنان!
اینسان اوغلو سورگون‌لرى گؤرورسنمى؟ کؤرپه‌لرى، یاشلى‌لارى، قادین‌لارى،گؤرورسنمى؟
بورا عیراق، افغانستان، بورا کئشمیر، تونئس، سن بیر دایان!
آفریقادیر بورا، اورتا دوغو، بورا جاهان.
هئچ اولماسا بونو ائشیت، همده اینان:
اینسانلار باریش ایچینده یاشاماق ایسته‌ییرلر. اینان. اینان.
(2)
دولانديم، گزديم بوتون دونيانی. گؤردوم اوندا اولان هر يانی. سونوندا بير تك اينساندان قورخدوم. اؤز سويون قيریب، آرادان آپاران يالنيز اينسانی گؤردوم. هر گون بومبالار سالان، سوچسوز كؤرپه‌لرين ائوينی ييخان! تكجه اينسانی گؤردوم. دوستونون آياغی آلتينی قازان، ييخيلارسا آرتيق بير تپيك ووران، فقط اينسانی گؤردوم. قونشوسو آج ياتسادا، تکجه اؤز قارنينی دولدوران، فقط، اينسانی گؤردوم.
تاريخ‌لری ورق‌له‌ديم. يئنه دونيادا اؤز ائوينی ييخان، واللاه يالنيز اينسانی گؤردوم!
آلداديريق اؤزوموزو! حئيوان آديندان قاچماغا، اينسان آدينی سئچميشيك. نه بيليم، اولا‌بيلر، يازيق حئيوان‌لارين آدی كورلانماسين دئيه اؤزوموزه اينسان دئميشيك!
(3)
تانریم،
منه دینجلیک وئر، سئومک، الدن یاپیشماق، اؤز گوونج، یولداشلیق، باریش سئورلیک و بوتون گؤزلیک‌لری وئر…
بوتون اینسانلاری سئومک ایسته‌ییرم، باریشی، گؤزل‌لییی اونلارلا پایلاشماق ایسته‌ییرم…
عزیز تانریم، نه گؤزل اولار بئله یاشام،
یولداش اولوب، باریش ایچینده ال- اله وئریب سئوینج له یاشایاق…
اوشاقلاری سئوک، سینیرلاری قالدیراق، اورکلره ایشیق ساچاق، کیمسه‌یه ضرر وئرمه‌ییب، الدن توتاق، بیر-بیریمیزه گولمک یئرینه، بیرگه گولک، سئوینجی بوتون گؤیه، یئره سه‌رک…
عالم گؤزل، حیات گؤزل، سئونلرین گؤزلرینده…
یک پاسخ
یاشاسین صولح ایسته ین اینسانلار