اوخوماق زامانی: 2 دقیقه

اشتراک گذاری در facebook
اشتراک گذاری در twitter
اشتراک گذاری در whatsapp
اشتراک گذاری در telegram
اشتراک گذاری در email
چئویرن: ایشیق
ترجمه: ایشیق
ایشیق
00:00
00:00

بو یازی‌نین صوتی نسخه‌سی حاضرلانماییب. بو یازی‌نی اؤز سسینیزله اوخویوب بیزه گؤندره بیلرسینیز.

گئجه تزه باشلانیب. بؤیوک خانین  ائوینده توی- دویوندو, چال- چاغیر. هئچ کیم بیلمیر نولوبدور. یاخیندان هم اوزاقدان ائشیدن بی‌, پاشالار ها تئز گلن, گل ها گل.

 امیر وئریب بؤیوک‌خان قویون قوزو کسیلیر؛ قازان‌لار آسیلیر؛ کابابلار چکیلیر؛ شیشلر اوجاقلارا دوزولور؛ سفره‌لر آچیلیر؛ بشقابلاردا چنجه پیلو اییسی باسیر هر یانا. بوللو سفره، یئین کیم، “خان ساغ اولسون!” دئین کیم. یالتاق عاشیق ساز چالیر، دمین توتور گیج عسگر:

بؤیوک خانسان گول یئتر,
یاغی توتان چوخ بتر.
موشکنازیم دور اوینا!
ائتمه نازیم دور اوینا!

 کند کاتداسی اویناییر؛ اوغرو ممد، کله عاباس، قوتور قاسم، تولکو حسن، چوغول رحیم، کیفیر هشیم، سیرتیغ حمزه، دل‌له ولی، پیشیک عابدوللا جالمان گئدیب، های سالیرلار؛ سؤز آپاریب, سؤز گتیرن قاطر موحو کئف ایچینده کئف چیخاردیر، هئچ بیلمه‌ییر بو دونیانین هاراسیدی.

خان ائوینده بو شنلیگی صبحه قده‌ر، گون چیخینجا اوزادیرلار. سحر چاغی دونبک عزیز بؤیوک خانین، امرین آلیب هر بیر کنده بیر خبرچی یولا سالیر: بؤیوک پاشا امیر وئریب، ها تز گلن، ناهار چاغی بؤیوک کتده، خان ائوینده بیر نوماییش اولمالی‌دی؛ بیر یاغینی خان توتدوروب، چارمیخا چکدیرملی‌دیر.

 چاتدی خبر. هامی آلدی خانین امرین، ائشیتدیلر، گون اورتایا چاتمامیشدان هر بیر کتدن بؤیوک کیچیک، زنن, اوشاق یولا دوشوب، خان کندینه چاتیشدیلار. حصارلانمش بیر حیاطین دؤره‌سینی آلدی ملت، خانلار آرا توی دویوندو، ملت ایسه مین اضطراب، کیمسه بیلمیر کیم توتولوب , بو نه ایشدی!

امیر گلدی، یول وئرینیز! گتیریرلر بیر جاوانی، ایاغیندا قاندالاق، ایکی  قولو قافالی, باشیندا چال پاپاخ، هوندور بویلو، ائنلی کورک، شیمشاد سایاق، سئوئر جاوان، بیر باخیشدا خالق عاشیقی، ظولمه قاشی نیفرت توپو, بیردن باخدی خالقا ساری، آیدین آشکار اعلام اتئدی: من نبی‌یم, قوچاق اوغلو قوچاق نبی.

یول آچدلار کئچسین دئیه بؤیوک حیاط , هوندور حاصار اورتاسینا، کئچین! دئیه آپاردیلار. بی‌لر، خانلار، هم پاشالار  بو صحنه‌دن لذت آلیب، ذوقه گلیب, دانیشماغا باشلادیلار: – بو یاغینی نه جور توتوب، باغلاییبلار، آج و سوسوز ساخلاییبلار؟ اوزون، قیسا، یاریم, بیتؤو دانیشدیلار. خان عدالت گؤسترمه‌یه امیر وئردی, بو یاغی‌یا بیر فرصتده سیز وئرینیز آخر آندا, آخر دمده بیر ایسته‌یی اولا بیلر.

قوچاق نبی بو فرصته چوخ سئویندی، قیفیل‌بندی آچین دئدی, بوز آتیم‌لا گؤروشدورون.

 امیر گلدی بؤیوک خاندان، آچین دئدی گؤروشدورون بو یاغی‌نی بوز آتی‌لا. هجرینین خله‌تیله بیر اؤلدوروب آتمالی‌یام، چارمیخا دا اؤزوم چکیب، قانینا ال قاتمالی‌یام.

 یول وئردیلر بوز آت گله، بوز آت دئمه قوجا قارتال، یئری گؤیو گمیریردی، گؤرن کیمی او نبینی، ایاقلارین چالدی یئره، شیهه چکیب, کیشنه‌ینده، داغ دره‌نی آلدی سسی، دئمک اولار بوتون ائلده, اوبالاردا قالدی سسی. قهرلندی قوچاق نبی, اوزون توتوپ او ملته دئدی بئله:

آزادلیق اوغروندا یوللار یورغونو

ائلینه جان آتمیش ائلین وورغونو

همیشه قیرمیشدیم تورو, تورغونو

ایندیسه باغلانیب یامان توردایام

بوز آتینی آلدی نبی، الین چکدی تومارلادی، بئلین, یالین قویروغونو سیغاللادی، الین چکدی سینه‌سینه آندیردی کی یامان آن‌دی، اؤپدو گؤزون، پیچیلدادی قولاغینا :

بوز آت سنی سر طووله‌ده باغلارام

آند ایچیرم قیزیل گوموش ناللارام

اگر منی بو دعوادان قورتارسان

آند ایچیرم مخمر چولدان چوللارام

بوز آت سؤزو تئز آنلادی، اؤزون ییغدی, گؤزون آچدی, قاچاق یولون نیشانلادی. نبی اؤزون حاضیرلادی، ایاق باسدی اوزنگی‌یه, اوزون توتوب جمعیته دئدی بونو اوجا سسله:

آنما, اینانما آ گولوم بو ستم قالمالی‌دیر

وطن اوغلو بی‌دن, خان‌دان قصاصین آلمالی‌دیر

بابک کیمی اوردولارا ولوله سالمالی‌دیر

چکدیم اوزنگی بوز آتا, شیمشک‌تک شاخماغیما باخ!

بؤیوک خانین اوره‌گینی یاندیریب یاخماغیما باخ!

نبی‌نین ایکینجی ایاغی یئردن قوپان کیمی بوز آت یئددی گوجون بیر ائدیب, حاصاردان گولله کیمی آشدی، گؤزو یوموب آچینجا، گؤز اؤنوندن ایتدی نبی.

ال چالیندی، ملت آرا توی دویون، یاسا باتدی بی پاشانین اوباسی.

اشتراک گذاری در print
چاپ

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *