(اورمو مکتبینین ان قوجامان افندیسی اولان «عاشیق دهقان»ین خاطیره‌سینه)
مین ایللر بویو دیلیمیزی، شعریمیزی، موسیقیمیزی، فولکلوروموز، میفیک دوشونجه‌لریمیز، دئییملریمیز، اؤیودلر، حسرتلر و سئوینجلریمیزی قوپوز ایله، دوتار ایله، ساز ایله ائلدن ائله، تویدان تویا، بویدان بویا ترننوم ائده‌ن، سسلندیرن و تک باشینا هم شاعر، هم چالقیچی هم خواننده اولان شامان‌لاریمیز، قام‌لاریمیز، سویچولاریمیز عاشیقلاریمیزین تورک دیللی میللتلرین بوینوندا اونودولماز حاقلاری وار. قیرقیزلاردا ماناس داستانی ۵۰۰ مین مصراع حجمینده (۸ دفعه فردوسی شاهنامه‌سیندن داها بؤیوک منظوم ناغیللار توپلوسو)، اؤزبک‌لرده آلپامیش داستانی، اوغوز طایفلاریندان اولان بایاتلار ایچینده دده قورقود اؤگودلری ایله، شعرلری ایله، قوپوزو ایله بوی بویلاییب سوی –سؤیله‌مک‌له ۱۵ عصره یاخین تورکون اولوسونون گؤرکملی ائلچیسی، باشچیسی و سانجاقداری اولموشدو.
بشرین کؤچری یاشادیغی چوبانلیق دؤورونده بوتون تورکستان تورپاقلاری بویونجا عاشیقلاریمیز مدنیتین، انسانلیغین، غیرتین، اونورون، آنا- آتا اؤگودونون، ناموسون، شرفین قایغی‌کئشی و قورویوجوسو اولموشلار و دیلیمیزین اینجه‌لیکلرینی قوپوز تئللریله ائللریمیز ایچینده یاییب دیلدن – دیله، سینه‌دن سینه‌یه هوپدورموش و شفاهی خلق ادبیاتی‌نین جارچیسینا چئوریلمیشلر. دده قورقود، دده علعسگر، عاشیق قریب، عاشیق شمشیر، عاشیق قوربانی، توفارقانلی عاشیق عابباس، آنادولو دیارینین نهنگی اولان عاشیق وئیسل، عاشیق دوللو موصطفی، خویلو عاشیق اصلان، اورمولو عاشیق فرهاد، عاشیق درویش، قره داغلی عاشیق غافار، یئکانلی عاشیق علی و مینلرجه تورکلر آراسیندا سپه‌لنمیش آدلی سانلی عاشیقلار و اورمو مکتبینین ان قوجامان افندیسی اولان بوگون ایتیردیگیمیز «عاشیق دهقان» مدنیت ائلچی‌لری جارچیلاری کیمی تانیلمیشلار. اونلارین هر بیرسینین سؤزلری، سسلری، سؤیله‌دیکلری بایاتی‌لار، قوشمالار، گرایلی‌لار، تجنیسلر، مخمس‌لر، دوداق ده‌یمزلر، قیفیلبندلری یوزلر ناغیل لیریک حماسی داستانلاری یئنی یئتمه عاشیق نسلینین و بو گون عاشیقلیق آدینی شرفله داشییان یوزلر عاشیق، عاشیق قوربان علیار عاشیق حجت، عاشیق محبوب، عاشیق آراز ائل سس کیمی وطن عاشیقلرینین دیللر ازبری سؤزلری و یادیگار قالمیش سازلاری ابدی بایراغیمیزا چیوریلیبدیر.

بیری گئدر یوزو بیتیر یئرینده
بیز ده اولان بوخزینه توکنمز
اولوسومون کؤکلری چوخ درینده
هیچ بیر میللت بیله‌گینی بوکنمز

درین حوزنله باشین ساغ اولسون وطن!

آذرآیی نین بیری ۱۴۰۴- اورمو