بو گون «آیهان»ین دوغوم گونودور. یاخیندان گؤرمه‌دیییم بو آدامی سانکی یوز ایللردیر تانیییرام. ادبیاتیمیز اوچون «یئنی‌قاپی»دا دانیلماز زحمتلر چکن بو اینسانین دیلیمیزه ائتدییی خیدمتلر گؤز اؤنونده‌دیر. سون زامانلار آغیر خسته‌‎لیکله ال به یاخا اولان دوستوموز، ایندی ایسه آجی دوروملار یاشاییر. خسته‎لیک جانینی بوروسه ده داغلارین اراده‌سینی گؤستریر.
اؤتن چاغ دانیشدیغیما رغمن، یوز اون کیلودان اللی کیلو آغیرلیغا اوغرایان بو آدام، آیلارجا هئچ نه یئیه بیلمه‎ییب، چتینلیک چکسه‌ده رمان یازیر، ائدیت ائدیر، مجوز آلیر، چاپ ائدیر، مخاطبلره گؤنده‌‎ریر، باشقا دیللره چئوریلمه‌‎سینه جان آتیر. بو اینسان بو دورومدا گؤردویو ایش و اوغراشدیغی مساله آوروپا یوخسا آمئریکا چئوره‌سینده یاشاییردیسا اراده، عشق و ماراغی اوچون خبر ویترینلرینده جانلاناجاقدی. اثرین مؤحتواسیندان یانا، هر آن اؤلومله اوغراشان اینساندا اولان اراده اوچون.
هر زامان یادلاریمیزدا آدی قالان یازارلاردان اولان «آیهان»ین یقین کی بؤیوک روحونون تسخیر اولونماماسی اونودولمایاجاق. آغیر و آجی گونلرینده «سسلر تراژدیسی خسته‌خانا یاتاغیندا» آدلی رمان یارادیر. ادبیات وورغونو، دیل، فلسفه‌ و پیسخولوژی ساحه‌لرینده گئنیش معلوماتی اولان و آغیر کانسئرله ائشیتسیز بیر ساواشی قاباغا آپاران آیهانین بو اثرینده گوجلو بیر ادبی دیل اوخویوروق. فلسفی آنلار و پیسخولوژیک دوروملار تجروبه ائدیریک. بیر یازارین اؤلوم دیریم آراسینداکی یاشادیغی آنلاری، شاشیردیجی لحظه‌لرین آغیرلیغینی و اؤلومله دارتیشماسینی سئیر ائدیریک.
آیهان بو رُماندا گؤزو گؤرونمه‌ین کؤلگه‌سی ایله اوچونجو کیمسه اولاراق دانیشیر. یازار، هئمودیالیز بؤلمه‌سینین دووارینا سؤیکنمیش بو کاراکتری وهم، خیال و بیر وجودون پارچالانمیش ورژنینی کاراکتریزاسیونلاشدیریر. بئینین ایچینده اولان مختلف ابعاد او جومله ائقو، اید و سوپرائگونون ائشیک واریانتینی یارادیر و شکسپیر سایاق هملتین دیلیندن اولوب اولماماق، قالیب قالماماق، سسله‌نیب سسلنمه‌مک مساله‌سینی خلق ائدیر.
۱۴۰۴/۰۵/۱۹